Gujarati News

મુંબઈ, તા.૧૮ : સોમવારે સવારે મુંબઈ-પુણે એક્સપ્રેસ વે પર બોરઘાટ નજીક છ વાહનો એકબીજા સાથે ખરાબ રીતે અથડાયા હતા. ત્રણ કાર, એક ખાનગી બસ, એક ટેમ્પો અને એક ટ્રેલર અકસ્માતમાં એકસાથે ટકરાયાં હતા. અકસ્માતમાં ત્રણ લોકોના ઘટનાસ્થળે જ મોત થયા હતા અને છ લોકો ઘાયલ થયા હતા. ઘાયલોને નજીકની ખાનગી હોસ્પિટલમાં દાખલ કરવામાં આવ્યા છે, જ્યાં બેની હાલત ગંભીર છે.

હાલની માહિતી અનુસાર, અકસ્માત બાદ પુણેથી મુંબઈનો રસ્તો સંપૂર્ણપણે બ્લોક થઈ ગયો છે. જેના કારણે રસ્તા પર વાહનોની લાંબી કતારો જોવા મળી રહી છે. મૃતકોમાં ત્રણેય લોકો કારમાં હતા. મળતી માહિતી મુજબ, રસ્તાની બાજુમાં પાર્ક કરેલા મરઘીઓથી ભરેલી ટ્રક સાથે પહેલા એક કાર અથડાઈ હતી. આ પછી પાછળથી આવતા હાઇ સ્પીડ ટ્રેલર કાર સાથે અથડાયું હતું. જેના કારણે કાર સંપૂર્ણ રીતે કચ્ચરઘાણ થઈ ગઈ હતી. હાલમાં કારમાં સવાર લોકોના મૃતદેહ બહાર કાઢી શકાયા નથી.

હાઇવે પોલીસની ટીમ સ્થળ પર રાહત અને બચાવ કાર્યમાં વ્યસ્ત છે. મળતી માહિતી મુજબ અકસ્માતમાં ટ્રક ડ્રાઈવરની ખામી સામે આવી રહી છે. હાલ પોલીસે તેને કસ્ટડીમાં લીધો છે. આ અકસ્માતમાં બે મોટા વાહન વચ્ચે બુકડો વળી ગયેલી સ્વિફ્ટ કાર પુણેથી મુંબઈ તરફ જઇ રહ્યા હતા.

મહત્વનું છે કે મુંબઈ પુણે એક્સ્પ્રેસ વે મોતનો હાઈવે બનતો જઈ રહ્યો છે. છેલ્લા કેટલાક મહિનામાં અહીં ઘણા અકસ્માત થયા છે અને લોકોએ જીવ ગુમાવ્ય છે. અકસ્માતની વણઝારોની વાત કરીએ તો ગત ફેબ્રુઆરીમાં ટેમ્પો, ટ્રેલર અને કાર એકબીજા સાથે અથડાતાં ૫ લોકોના ઘટનાસ્થળે મોત થયા હતા. તેવી જ રીતે જુલાઈ મહિનામાં પણ એક ભયંકર અકસ્માતની ઘટના સામે આવી હતી. જેમાં પતિ, પત્ની અને ચાર વર્ષના દીકરાનું મોત થયું હતું. આ ઘટનાનો વીડિયો પણ ખાસ્સો વાયરલ થયો હતો.

આ વીડિયોમાં જોઈ શકાતું હતું કે એક કન્ટેનર બેકાબૂ બની ગઈ અને પહેલાં કાર સાથે ટકરાય છે અને બાદમાં આગળ જઈ રહેલાં એક ટ્રક સાથે ધડાકાભેર ટકરાય છે. આમ એક્સ્પ્રેસ વે પર ઝડપની મજા સાથે મોતની સજાના અનેક દાખલા છે. એક્સ્પ્રેસ વે પર વાહનોને ચલાવવાની સ્પીડથી લઈને ઉભા કરવા સુધીના જુદા જુાદ નિયમો હોય છે જેના યોગ્ય પાલનના અભાવે આવા અકસ્માતો થતાં રહે છે.