Gujarati News

નવી દિલ્હી,તા.૧૬ : તમે અત્યાર સુધી એવું સાંભળ્યું હશે કે લોકો પોતાની ગમતી ગાડી અથવા બાઈકની ખરીદી કરવા માટે રાહ જોતા હોય છે. પણ, પહેલી વખત દેશમાં સાઈકલની ખરીદી માટે વેઈટિંગ જોવા મળી રહ્યું છે. કારણકે સમગ્ર દેશમાં સાઈકલની માગમાં વધારો થયો છે. છેલ્લા ૫ મહિનામાં દેશમાં સાઈકલનું વેચાણ લગભગ બમણુ થઈ ગયું છે.

પ્રાપ્ત માહિતી મુજબ, દેશના દ્યણાં શહેરોમાં લોકોને પોતાની પસંદગીની સાઈકલ ખરીદવા માટે રાહ જોવી પડી રહી છે. દેશમાં પહેલી વખત સાઈકલ પ્રત્યેની લોકોની આટલી વધારે રૂચિ જોવા મળી રહી છે. મે મહિનાથી લઈને સપ્ટેમ્બર ૨૦૨૦ સુધીમાં દેશમાં કુલ ૪૧,૮૦,૯૪૫ સાઈકલના યુનિટનું વેચાણ થયું છે. દેશના મોટા શહેરોમાં છેલ્લા ૪ થી ૫ મહિનામાં સાઈકલની માગમાં લગભગ પાંચગણો વધારો થયો છે. સાઈકલના કેટલાંક નવા અને આધુનિક મોડેલ માટે ગ્રાહકને રાહ જોવી પડી રહી છે. કોરોનાની મહામારીના કારણે જિમ, સ્વિમિંગ સહિતના હેલ્થ સેન્ટર બંધ રહેતા લોકોએ હવે ફિટનેસ જાળવવા માટે સાઈકલની ખરીદી કરી છે.

એક જાણીતી સાઈકલ ટ્રેડિંગ કંપની તરફથી જણાવ્યા મુજબ કોરોના વાયરસથી બચવા માટે લોકો હવે ભીડથી દૂર જોવા મળી રહ્યા છે. ઘરની આસપાસ કયાંય જવું હોય અથવા ઓફિસ જવા માટે પબ્લિક ટ્રાન્સપોર્ટનો ઉપયોગ કરવાની જગ્યાએ લોકો સાઈકલનો ઉપયોગ કરી રહ્યા છે. આ કારણે સાઈકલની માગમાં વધારો થયો છે. દેશમાં કોરોનાની મહામારીના કારણે લાગુ લોકડાઉન બાદ સાઈકલના વેચાણમાં ૧૫ થી ૫૦ ટકાનો વધારો થયો છે. લોકો હવે ઘરની આસપાસ કોઈ કામ હોય તો સાઈકલ લઈને જવાનું પસંદ કરી રહ્યા છે. કારણકે સાઈકલના ઉપયોગથી હેલ્થ સારી રહે છે અને ખર્ચો પણ ઓછો થાય છે. લોકો હવે રૂપિયા ૧૦ હજારની આસપાસની કિંમતની સાઈકલ ખરીદતા જોવા મળી રહ્યા છે. યુવાનોમાં ખાસ કરીને ગિયરવાળી સાઈકલનો ક્રેઝ જોવા મળી રહ્યો છે. પોતાની પસંદગીની સાઈકલ ખરીદવા માટે લોકો રાહ જોઈ રહ્યા છે અને બુકિંગ કરાવી રહ્યા છે.