Gujarati News

ટોરોન્‍ટો, તા.૧૬: કેનેડામાં ૭૦૦થી વધુ વિદ્યાર્થીઓનું ભવિષ્‍ય જોખમમાં છે. આ વિદ્યાર્થીઓને કેનેડાથી ભારત મોકલવામાં આવી રહ્યા છે. તેના ભવિષ્‍ય સાથે રમતા ઠગ એજન્‍ટોએ નકલી વિઝાની મદદથી તેઓને કેનેડા મોકલી દીધા હતા. આ વિદ્યાર્થીઓએ જલંધરમાં સ્‍થિત એજ્‍યુકેશન માઈગ્રેશન સર્વિસ સેન્‍ટરમાં તેમના વિઝા માટે અરજી કરી હતી. તેનું નેતળત્‍વ બ્રિજેશ મિશ્રા નામના વ્‍યક્‍તિ દ્વારા કરવામાં આવી રહ્યું હતું, જેણે કેનેડાની પ્રખ્‍યાત હમ્‍બર કોલેજમાં પ્રવેશ ફી સહિત તમામ ખર્ચ માટે વિદ્યાર્થી દીઠ ૨૦ લાખ રૂપિયા વસૂલ્‍યા હતા. એર ટિકિટ અને તેની સુરક્ષા માટે અલગથી રકમ હતી.

હવે જ્‍યારે કેનેડિયન બોર્ડર સિકયોરિટી એજન્‍સી (CBSA) દ્વારા નકલી વિઝા ધરાવતા ૭૦૦ વિદ્યાર્થીઓની ઓળખ કરવામાં આવી છે, ત્‍યારે એજન્‍સીએ તેમને ભારત પાછા ફરવા માટેનો પત્ર જારી કર્યો છે, આ વિદ્યાર્થીઓ ૨૦૧૮-૧૯માં અભ્‍યાસ માટે કેનેડા ગયા હતા. આ છેતરપિંડી ત્‍યારે પ્રકાશમાં આવી જ્‍યારે આ વિદ્યાર્થીઓએ કેનેડામાં પરમેનન્‍ટ રેસિડન્‍સી (PR) માટે અરજી કરી, જેના માટે ‘એડમિશન ઑફર લેટર્સ' ચકાસણી હેઠળ આવ્‍યા, એટલે કે CBSA દ્વારા વિદ્યાર્થીઓને વિઝા ઇશ્‍યૂ કરવામાં આવેલા દસ્‍તાવેજોની તપાસ કરવામાં આવી. તમામ વિદ્યાર્થીઓના ઓફર લેટર નકલી હોવાનું જાણવા મળ્‍યું હતું.

તપાસકર્તાઓએ જણાવ્‍યું કે આમાંથી મોટાભાગના વિદ્યાર્થીઓએ તેમનો અભ્‍યાસ પૂર્ણ કરી લીધો છે, વર્ક પરમિટ અને કામનો અનુભવ મેળવ્‍યો છે. જ્‍યારે બાળકોએ પીઆર માટે અરજી કરી, ત્‍યારે જ તેઓ મુશ્‍કેલીમાં મુકાઈ ગયા. કેનેડામાં આ શિક્ષણ છેતરપિંડી પ્રથમ વખત સામે આવી છે. નિષ્‍ણાતોએ જણાવ્‍યું હતું કે આટલી મોટી સંખ્‍યામાં છેતરપિંડી એટલા માટે થઈ છે કારણ કે કેનેડામાં મોટી સંખ્‍યામાં લોકો અરજી કરે છે.

આ મામલામાં વિદ્યાર્થીઓએ કહ્યું કે તેઓ સંપૂર્ણપણે નિર્દોષ છે કારણ કે એજન્‍ટોએ તે ખૂબ જ હોશિયારીથી કર્યું હતું. ઘણા વિદ્યાર્થીઓએ જણાવ્‍યું હતું કે એજન્‍ટો દ્વારા તેમની ફી પરત કરવામાં આવી હતી જેના કારણે તેઓએ અન્‍ય કેટલીક કોલેજોમાં પ્રવેશ લીધો હતો. ફીના રિફંડને કારણે તે ઓછી શંકાસ્‍પદ હતી. જલંધરના એક કન્‍સલ્‍ટન્‍ટ કે જેઓ છેલ્લા ૧૦ વર્ષથી વિદ્યાર્થીઓને કેનેડા મોકલી રહ્યા છે, તેમણે ધ ઈન્‍ડિયન એક્‍સપ્રેસને જણાવ્‍યું કે કોલેજો તરફથી નકલી ઑફર લેટર્સ મેળવવાથી લઈને વિદ્યાર્થીઓને વિઝા માટે નકલી ફીની ચૂકવણી પૂરી પાડવી, આવી છેતરપિંડીઓમાં સંખ્‍યાબંધ પરિબળો સામેલ છે. કોલેજો ફી જમા કરાવ્‍યા પછી જ વિઝા આપે છે.