Gujarati News

લખનૌ તા. ૧૬ : ઉત્તર પ્રદેશમાં એક પ્રેમી યુગલની જબરદસ્તી લગ્ન કરાવવાની ઘટના સામે આવી છે. ઘટના મહારાજગંજના શિવસનિયા ગામની છે. પોલીસ પણ આ મામલાની તપાસમાં લાગી ગઈ છે અને તપાસ બાદ કાર્યવાહી કરવાની વાત કરી છે.

હકીકતમાં આ મામલો ૧૧ જાન્યુઆરીનો છે. મોડી રાત્રે એક પ્રેમી યુગલ ઘરથી બહાર કયાં મળવા માટે આવ્યું હતું. ત્યારે જ ગામના કેટલાક લોકોએ તેમને વાત કરતા જોઈ લીધા અને આખા ગામને બોલાવીને એકઠું કર્યું. પ્રેમી યુગલને રાતના સમયે પ્રેમમાલાપ કરતા જોઈને ગામ લોકો ભડકી ગયા અને ત્યાં જ પંચાયત બોલાવી લીધી. પંચાયતે પણ તરત જ પોતાનું ફરમાન સંભળાવીને બંનેના તરત લગ્ન કરાવવા માટે કહ્યું.

તરત જ ગામ લોકોએ રાતના ૧૧ વાગ્યે ત્યાં જ બધા લગ્નની તૈયારી કરી લીધી. એક કારની લાઈટમાં પ્રેમીએ પ્રેમિકાના માથામાં સિંદૂર પુરાવીને ઉતાવળમાં લગ્ન કરાવી દીધા. આ વિચિત્ર લગ્નનો કોઈએ વીડિયો બનાવીને તેને સોશિયલ મીડિયામાં પોસ્ટ કરી દીધો. જે ઝડપથી વાઈરલ થઈ રહ્યો છે. સૌથી હેરાન કરનારી વાત એ છે કે યુવતી હજુ પણ સગીર છે. તેમ છતાં ગામ લોકોએ તેના લગ્ન કરાવી દીધા.

ઘટના સામે આવ્યા બાદ મીડિયાની ટીમ જયારે ગામમાં પહોંચી તો ગામ લોકોએ જણાવ્યું કે બંને એકબીજાને પ્રેમ કરતા હતા. યુવતીના લગ્ન કયાંક બીજે નક્કી થઈ ગયા હતા. તેમ છતા તે પોતાના પ્રેમીને મળતા જતી હતી. યુવતીને પરિવારના લોકોએ હાલમાં કેમેરા સામે કંઈ પણ બોલવાનો ઈનકાર કર્યો છે. યુવતી સગીર છે તેવી સૂચના મળતા પોલીસે કેસ નોંધીના મામલાની તપાસ શરૂ કરી છે.(૨૧.૧૮)