Gujarati News

નવી દિલ્હી તા. ૧૫ : ગુજરાત વિધાનસભાની ચૂંટણીમાં પાકિસ્તાન, તાઈવાન પછી હવે ચીનનું નામ પણ સામે આવી રહ્યું છે. પરંતુ ચીનનું નામ વિવાદોને કારણે નહીં, ચીનની મીડિયાને કારણે લેવાઈ રહ્યું છે. ચીનની મીડિયાના રિપોર્ટ્સ અનુસાર, ચીનના ઓબ્ઝર્વર્સ ગુજરાત ચૂંટણીના પરિણામો પર નજર રાખી રહ્યા છે કારણકે તે આને વડાપ્રધાન નરેન્દ્ર મોદીના સુધારાવાદી એજન્ડા બાબતે ભારતીયોના વલણનો લિટમસ ટેસ્ટ માની રહ્યા છે.

ગ્લોબલ ટાઈમ્સ અનુસાર, ચીન અને ભારત વચ્ચે આર્થિક પાર્ટનરશિપ સતત વધી રહી છે. આ સ્થિતિમાં ભારતની અર્થવ્યવસ્થામાં થઈ રહેલા બદલાવ ચીન માટે ચિંતાનો વિષય છે. રિપોર્ટ અનુસાર, મોદીના આર્થિક સુધારાઓનો દેશની અન્ય પાર્ટીઓ અને અર્થશાસ્ત્રીઓએ ખુબ વિરોધ કર્યો છે. દેશમાં વિકાસને આંકવા માટે ગુજરાત મોડલનું ઉદાહરણ આપવામાં આવે છે. ચૂંટણીના પરિણામો જે પણ હોય, તેની અસર પીએમ મોદીના અન્ય સુધારાવાદી એજન્ડા પર લોકોના વલણ પર પડશે.

આર્ટિકલમાં લખવામાં આવ્યું છે કે, જો ભાજપ જીતશે પણ વોટ શેર ઘટશે, તો તે પણ તેના માટે ખતરાની ઘંટી છે. ભાજપની હાર ભારતના આર્થિક સુધારાઓમાં થયેલી ચૂક દર્શાવશે. જે કંપનીઓ ભારતમાં કામ કરી રહી છે તેમણે ઈલેકશનના પરિણામો પછી આર્થિક નીતિઓમાં સંભવિત બદલાવ માટે તૈયાર રહેવું જોઈએ.