Gujarati News

વિજયવાડા,તા.૧૫:દિલ્હીના ઠગ વિશે તોદ્યણી વાતો સાંભળી હશે અને તેના પરથી બોલિવુડમાં ૧૯૫૮માં એેક પિકચર પણ બની ચૂકયું છે, જેમાં કિશોર કુમાર મુખ્ય ભૂમિકામાં હતા. દિલ્હીનો આવો જ એક ઠગ આંધ્ર પ્રદેશના દંપતી સાથે છેતરપિંડી કરીને ફરાર થઈ ગયાની દ્યટના સામે આવી છે.આંધ્ર પ્રદેશમાં દેવામાં ડૂબેલું એક દંપતી પોતાની કિડની વેચવા ઈચ્છતું હતું, પરંતુ તે ફ્રોડનો શિકાર બની ગયું. બે કરોડ રૂપિયામાં કિડનીનો સોદો કરાવી આપવાની ખાતરી આપીને એક ઠગે દંપતીને પોતાની જાળમાં ફસાવ્યું. એક તો તેમના પર દેવું હતું જ અને ઉપરથી તેમણે ઠગની વાતોમાં આવી જઈ ૧૭ લાખનું બીજું દેવું કર્યું. પરંતુ, કિડનીનો બે કરોડ રૂપિયાનો સોદો થવાની વાત તો દૂર રહી, ઠગ તેમના ૧૭ લાખ રૂપિયા લઈને ફરાર થઈ ગયો.

વિજયવાડાની નજીક આવેલા પેનામલુરુના ઈન્સ્પેકટર એમ સત્યનારાયણે જણાવ્યું કે, એન ભાર્ગવી (૩૪ વર્ષ) અને કામેશ્વર યાનામાલા કુદુરુના રહેવાસી છે. તેઓ પાર્ટનર્સ સાથે મળીને એક મેડિકલ શોપ ચલાવતા હતા. બિઝનેસ પાર્ટનર સાથે તેમને વિવાદ થયો અને તે પછી તેમને ભારે નુકસાન થયું. તેમની પર દેવું થઈ ગયું.

દેવું ચૂકવવા માટે કયાંયથી રૂપિયાની વ્યવસ્થા નહોંતી થઈ રહી. ભાર્ગવીએ નિર્ણય કર્યો કે, તે પોતાની કિડની વેચી દેશે. તેમણે કિડની ખરીદનારાઓની તપાસ શરૂ કરી દીધી. આ દરમિયાન તેઓ દિલ્હીની સકરા વર્લ્ડ હોસ્પિટલ પહોંચ્યા.અહીં તેમની મુલાકાત એક શખસ સાથે થઈ. તેણે પોતાનું નામ ચોપડા સિંહ જણાવ્યું. તેણે દંપતીને પોતાની વાતોમાં ફસાવ્યા અને તેમને વિશ્વાસ અપાવ્યો કે, તેમને કિડનીને બદલે બે કરોડ રૂપિયા અપાવશે.

કામેશ્વર અને ભાર્ગવી તેમની વાતોમાં આવીને ફસાઈ ગયા. તેમનો ફાયદો ઉઠાવી તેણે બંનેને કહ્યું કે, પ્રોસેસ ફીની રકમ તેમણે ચૂકવવી પડશે. તેણે એવું પણ કહ્યું કે, પ્રોસેસ પૂરી થયા બાદ તેમને એ રકમ પાછઈ મળી જશે. દંપતીએ કેટલાક લોકો પાસેથી વધુ રૂપિયા ઉધાર લીધા અને પ્રોસેસ ફીના નામ પર ચોપડા સિંહ નામના શખસને ૨૪ વારમાં ૧૭ લાખ રૂપિયા ટ્રાન્સફર કર્યા.

દંપતીએ જણાવ્યું કે, ચોપડા સિંહને રૂપિયા આપવા માટે તેમણે લોકો પાસેથી ઉધાર લેવા ઉપરાંત બેંકમાંથી લોન પણ લીધી. ૧૭ લાખ રૂપિયા આપ્યા બાદ પણ ચોપડા સિંહે કોઈ પ્રોસેસ ન કરી. તેણે દંપતી પાસે વધુ ૫ લાખ રૂપિયા માગ્યા. રૂપિયા પાછા માગવા પર તેણે દંપતીનો સંપર્ક કરવાનું બંધ કરી દીધું. પોતાની સાથે છેતરપિંડી થયાનું જણાતા દંપતીએ ચોપડા સિંહ નામના શખસ સામે ફરિયાદ નોંધાવી છે.