Gujarati News

બુલેટ ટ્રેનની અનુભૂતિઃ લકઝુરીયસ અને અત્યાધુનિક સુવિધાઓ ધરાવતો તેમ જ બુલેટ ટ્રેનની ફીલ કરાવતો અનુભૂતિ કોચ મુંબઈ સેન્ટ્રલના યાર્ડમાં પહોંચ્યો હતો. અમદાવાદ જવા માટે તૈયાર આ કોચનું ઈન્ટીરિયર પ્લેન જેવુ છે અને એની સીટો પણ પ્લેન જેવી જ આરામદાયક છે.

મુંબઈ, તા. ૧૩ :. વેસ્ટર્ન રેલ્વેમાં મુંબઈથી અમદાવાદ વચ્ચે દોડતી શતાબ્દી એકસપ્રેસમાં વહેલી તકે ભારતીય રેલ્વેનો સૌથી આરામદાયક 'અનુભૂતિ કોચ' જોડવામાં આવશે. આ કોચની ખાસિયત એ છે કે એ ૧૬૦ કિ.મી. પ્રતિ કલાકની ઝડપે દોડતી ટ્રેનમાં પણ એ એડજસ્ટ થઈ શકે છે અને એમાં પ્લેન જેવી સુવિધા છે.

આ કોચ મુંબઈ આવી ગયો છે અને એ મુંબઈ સેન્ટ્રલના ડેપોમાં છે. આઈસીએફ એ આ કોચ તૈયાર કર્યો છે. અનુભૂતિના એક કોચમાં ૫૬ સીટો છે. આ કોચની જાહેરાત બજેટમાં થઈ હતી અને એનું ભાડુ એ.સી. ફર્સ્ટ કલાસ કરતા થોડુ વધારે હશે.

આ કોચની સૌ પ્રથમ ટ્રાયલ ચંડીગઢ શતાબ્દીમાં થઈ હતી. એ પછી જયપુર શતાબ્દીમાં એ કોચ જોડવામાં આવ્યો હતો. ધીરે ધીરે દરેક શતાબ્દી અને રાજધાની ટ્રેનોમાં એ કોચ જોડવામાં આવશે. એ પછી મેલ અને એકસપ્રેસ ટ્રેનોમાં પણ અનુભૂતિ કોચ જોડવાની યોજના છે.(૨-૫)