Gujarati News

મુંબઈ : સાઉથ આફ્રિકા સામે સતત બે T20 મેચ હાર્યા બાદ હવે ટીમ ઈન્ડિયા સામે શ્રેણી બચાવવાનો પડકાર છે. દક્ષિણ આફ્રિકાએ દિલ્હી અને કટકમાં આસાનીથી મેચ જીતી લીધી પરંતુ હવે વિશાખાપટ્ટનમમાં ટીમ ઈન્ડિયા વાપસી કરી શકશે? આ સવાલનો જવાબ મેચ બાદ જ જાણવા મળશે. જો કે આ મેચ જીતવા માટે ટીમ ઈન્ડિયાને ઘણી મહેનત અને કેટલાક બદલાવની જરૂર છે.

 એવા અહેવાલો છે કે ટીમ ઈન્ડિયા ત્રીજી T20માં પ્લેઈંગ ઈલેવન માં ફેરફાર કરી શકે છે. બદલાવ જરૂરી છે કારણ કે ટીમ ઈન્ડિયા બેટિંગ અને બોલિંગ બંને મોરચે નબળી દેખાઈ રહી છે. દક્ષિણ આફ્રિકા પણ શાનદાર ક્રિકેટ રમી રહ્યું છે અને આ ટીમે પુનરાગમન કરવા માટે કંઈક અલગ કરવું પડશે. પરંતુ હવે સવાલ એ છે કે ભારતીય ટીમની પ્લેઈંગ ઈલેવનમાં શું ફેરફાર થશે?

ટીમ ઈન્ડિયામાં બે ફેરફાર નિશ્ચિત માનવામાં આવે છે. ઋતુરાજ ગાયકવાડ પ્રથમ બંને મેચમાં ફ્લોપ રહ્યો હતો, જ્યારે અક્ષર પટેલના માટે પણ તે સારી મેચો નહોતી. હવે આ બંને ખેલાડીઓ હવે ટીમની બહાર થઈ શકે છે. સવાલ એ છે કે તેમની જગ્યાએ કોને તક મળશે? ટીમ ઈન્ડિયા અક્ષર પટેલની જગ્યાએ વેંકટેશ અય્યરને તક આપી શકે છે. કારણ કે બેટિંગની સાથે તે મીડિયમ પેસ બોલિંગ પણ કરી શકે છે. ટીમ ઈન્ડિયા ઉમરાન મલિકને પણ પોતાની બોલિંગને મજબૂત કરવાની તક આપી શકે છે. ઓપનિંગમાં ઋતુરાજ ગાયકવાડનું પત્તુ સાફ થઈ શકે છે અને તેના સ્થાને દીપક હુડાને તક આપવામાં આવી શકે છે, જે બોલિંગનો વિકલ્પ પણ લાવે છે.

ઈશાન કિશન, શ્રેયસ ઐયર, દીપક હુડા, ઋષભ પંત, હાર્દિક પંડ્યા, દિનેશ કાર્તિક, વેંકટેશ ઐયર/ઉમરાન મલિક, ભુવનેશ્વર કુમાર, હર્ષલ પટેલ, અવેશ ખાન અને યુઝવેન્દ્ર ચહલ.

ટીમ ઈન્ડિયાએ ત્રીજી T20 જીતવા માટે જોરદાર રમત બતાવવી પડશે. આ સાથે તેણે રણનીતિમાં પણ ફેરફાર કરવો પડશે. જો સાઉથ આફ્રિકાની ટીમ સ્પિનરોને સારી રીતે રમી રહી હોય તો મીડિયમ પેસરોનો આક્રમણ જરૂરી છે. સાથે જ ભારતીય બેટ્સમેનોએ પણ પોતાનું સર્વસ્વ આપવું પડશે. સુકાની ઋષભ પંતની કેપ્ટનશીપ પણ સવાલોના ઘેરામાં છે. તેણે પોતાના બોલરોનો યોગ્ય ઉપયોગ કરવો પડશે.