Gujarati News

Gujarati News

News of Tuesday, 12th October 2021

બ્રિટનના ઇતિહાસમાં સૌથી ખરાબ રહી કોરોના સાથેની લડાઈ

સરકારે લોકોને ધકેલ્યા મોતના મુખમાં : રિપોર્ટમાં દાવો

લંડન તા. ૧૨ : કોરોનાવાયરસ સામે બ્રિટનની લડાઈ ઇતિહાસની સૌથી મોટી નિષ્ફળતાઓમાંની એક છે. આ છેલ્લા ૧૦૦ વર્ષની સૌથી મોટી સ્વાસ્થ્ય સમસ્યા તરીકે ઉભરી આવી છે અને તેણે સરકારી તંત્રને ખુલ્લું પાડ્યું છે. યુકેના એક રિપોર્ટમાં આ દાવો કરવામાં આવ્યો છે. કોમન્સ સાયન્સ એન્ડ ટેકનોલોજી કમિટી અને હેલ્થ એન્ડ કેર કમિટીનો આ રિપોર્ટ ૫૦ થી વધુ સાક્ષીઓ પર આધારિત છે. તેમાં ભૂતપૂર્વ આરોગ્ય સચિવ મેટ હેનકોક, કેટલાક વૈજ્ઞાનિકો સલાહકારોનો સમાવેશ થાય છે.

રિપોર્ટમાં કહેવામાં આવ્યું છે કે કોરોના મહામારી સામે સરકારનું વલણ ખૂબ જ શિથિલ હતું, જેણે લોકોને મોત તરફ ધકેલી દીધા. બેદરકારીને કારણે, પ્રારંભિક તબક્કામાં મૃત્યુદર વધ્યો, અને યુકે અન્ય દેશોની સરખામણીમાં સૌથી ખરાબ પ્રદર્શન કરતો હતો.

જયારે અન્ય દેશોએ કોરોના ચેપ ફેલાતાની સાથે જ લોકડાઉનની જાહેરાત કરી. તે પછી પણ યુકે સરકારે લોકડાઉનની જાહેરાત કરી ન હતી. વડા પ્રધાન બોરિસ જોનસને ૨૩ માર્ચ પછી લોકડાઉનની જાહેરાત કરી હતી. ઉપરાંત, કોરોનાનો સામનો કરવા માટે રચાયેલી સમિતિએ તેની રચનાના બે મહિના પછી એક બેઠક પણ યોજી હતી. આના કારણે પરિસ્થિતિ વધુ વણસી અને મૃત્યુદર વધ્યો.

રિપોર્ટમાં દાવો કરવામાં આવ્યો છે કે પ્રથમ કોરોના ટેસ્ટ બ્રિટનમાં વિકસાવવામાં આવ્યો હતો. આ હોવા છતાં, અહીં પરિસ્થિતિ સૌથી ખરાબ હતી.

આ સાબિત કરે છે કે સરકારનું વલણ ખૂબ જ નબળું હતું, અધિકારીઓ અને વૈજ્ઞાનિકો આ રોગચાળાના સંભવિત નુકસાનને ઓળખવામાં સંપૂર્ણપણે નિષ્ફળ રહ્યા હતા.

(11:35 am IST)