Gujarati News

નવી દિલ્‍હી, તા.૧૨: કોંગ્રેસની નજર આગામી લોકસભા ચૂંટણી પર છે. પાર્ટીએ આ ચૂંટણી જીતવા માટે તેના તમામ વિકલ્‍પો ખુલ્લા રાખ્‍યા છે. પરંતુ વર્ષ ૨૦૨૪ સુધી પહોંચતા પહેલા પાર્ટીને ઘણી કસોટીઓમાંથી પસાર થવું પડશે. આ વર્ષે ગુજરાત અને હિમાચલ પ્રદેશમાં ચૂંટણી બાદ આવતા વર્ષે મધ્‍યપ્રદેશ, રાજસ્‍થાન અને છત્તીસગઢમાં ચૂંટણી છે. તેમને લોકસભાની સેમિફાઇનલ માનવામાં આવે છે.

વર્ષ ૨૦૨૪ પહેલા ઘણા મહત્‍વપૂર્ણ રાજ્‍યો સહિત ૧૧ રાજ્‍યોમાં ચૂંટણી છે. પ્રથમ પરીક્ષા હિમાચલ પ્રદેશ અને ગુજરાતની ચૂંટણી છે. હિમાચલ પ્રદેશમાં દર પાંચ વર્ષે સત્તા બદલાતી રહે છે, તેથી કોંગ્રેસ ચૂંટણીમાં સારો દેખાવ કરે તેવી અપેક્ષા છે. ૨૦૧૭ની સરખામણીમાં ગુજરાતમાં પાર્ટીની સ્‍થિતિ બહુ સારી નથી. આવી સ્‍થિતિમાં પાર્ટી સમક્ષ અગાઉની કામગીરીનું પુનરાવર્તન કરવાનો પડકાર છે.

કોંગ્રેસનું સમગ્ર ધ્‍યાન રાજસ્‍થાન, છત્તીસગઢ, મધ્‍યપ્રદેશ અને કર્ણાટક પર છે. પાર્ટીના રણનીતિકારોનું માનવું છે કે જો કોંગ્રેસ રાજસ્‍થાન અને છત્તીસગઢમાં પોતાની સરકાર જાળવી રાખીને મધ્‍યપ્રદેશ અને કર્ણાટકમાં જીત મેળવે છે તો તેને લોકસભામાં ફાયદો થઈ શકે છે. પરંતુ તે સરળ નથી. કારણ કે, રાજસ્‍થાન, છત્તીસગઢ અને કર્ણાટકમાં પાર્ટી અંદરોઅંદર લડાઈ લડી રહી છે.

મધ્‍યપ્રદેશની સ્‍થાનિક સંસ્‍થાઓની ચૂંટણીમાં કોંગ્રેસે સારો દેખાવ કર્યો હતો. પ્રદેશ કોંગ્રેસના નેતાઓનું માનવું છે કે લોકો ભાજપથી નારાજ છે. આવી સ્‍થિતિમાં પાર્ટીને ચૂંટણીમાં તેનો ફાયદો મળી શકે છે. રાજસ્‍થાન અને છત્તીસગઢ પાર્ટી માટે ખૂબ જ મહત્‍વપૂર્ણ છે, કારણ કે આ બંને રાજ્‍યોમાં કોંગ્રેસની પોતાની સરકાર છે. પરંતુ આ બંને રાજ્‍યો વચ્‍ચેનો સંઘર્ષ પણ ચરમસીમાએ છે.

રાજસ્‍થાનમાં પણ દર પાંચ વર્ષે સત્તા બદલાય છે. આ સાથે છેલ્લા કેટલાક મહિનામાં સાં-દાયિક ધ્રુવીકરણ વધ્‍યું છે. મુખ્‍યમંત્રી અશોક ગેહલોત અને વરિષ્ઠ નેતા સચિન પાયલટ વચ્‍ચેનો ઝઘડો કોઈનાથી છુપાયેલો નથી. આવી સ્‍થિતિમાં પાર્ટીને પોતાની સરકાર જાળવી રાખવા માટે ઘણો સંઘર્ષ કરવો પડશે. ચૂંટણીમાં ભાજપની જૂથબંધીનો ફાયદો પણ પાર્ટીને મળી શકે છે.

છત્તીસગઢમાં કોંગ્રેસને ભાજપ તરફથી કોઈ ખાસ પડકારનો સામનો કરવો પડતો નથી. કારણ કે, ભાજપ પાસે કોઈ મોટો ચહેરો નથી. પરંતુ મુખ્‍યમંત્રી ભૂપેશ બઘેલ અને વરિષ્ઠ નેતા ટીએસ સિંઘદેવ વચ્‍ચેની ટક્કર ચૂંટણીમાં પાર્ટીની મુશ્‍કેલીઓ વધારી શકે છે. આવી સ્‍થિતિમાં પાર્ટીએ ચૂંટણી પહેલા પોતાનું ઘર ઠીક કરવું પડશે. તેવી જ રીતે કર્ણાટકમાં પણ કોંગ્રેસ માટે આંતરિક વિખવાદને દૂર કરવાનો પડકાર છે.