Gujarati News

લખનૌઃ ઉત્તરપ્રદેશમાં ૨૦૨૨ની વિધાનસભા ચુંટણી પહેલા પોતાની પહોંચ બ્રાહ્મણોમાં વધારવાના પ્રયાસો બહુજન સમાજ પાર્ટીના નેતા માયાવતીએ ચાલુ રાખતા વચન આપ્યું છે કે જો આવતા વર્ષે યુપીમાં અમે સત્તા પર આવશું તો બ્રાહ્મણ સમાજની સુરક્ષાનું અમે ધ્યાન રાખીશું.

અહીં યોજાયેલ 'પ્રબુધ્ધ વર્ગ સંમેલન'ના સમાપન સમારોહમાં સંબોધન કરતા માયાવતીએ કહ્યું, 'બ્રાહ્મણોએ સ્વીકાર્યુ છે કે વર્તમાન ભાજપા સરકારના શાસન કરતા બીએસપીના શાસન દરમ્યાન તેઓ વધુ સારી સ્થિતીમાં હતા. હું બ્રાહ્મણ સમાજને ખાતરી આપું છું કે જો આવતા વર્ષે અમે સત્તા પર આવીશું તો અમે તેમની સુરક્ષાનું ધ્યાન રાખીશું.'

કુખ્યાત બ્રાહ્મણ ગેંગસ્ટર વિકાસ દૂબેના ભત્રીજાની ૧૭ વર્ષની વિધવાને જામીન માટે કાનૂની લડત લડવાનું નક્કી કર્યાના થોડા દિવસોમાં જ માયાવતીની આ ખાતરી આવી છે. ૧૭ વર્ષની વિધવા ખુશી દૂબેની ઇન્ડીયન પીનલ કોડની વિવિધ  કલમો, જેમાં ખૂન અને ગુનાહિત પ્રવૃતિઓ પણ સામેલ છે, હેઠળ ધરપકડ કરાઇ છે અને છેલ્લા એક વર્ષથી તે બારાબંકીના જુવેનાઇલ સેન્ટરમાં મોકલી અપાઇ છે.