Gujarati News

નવી દિલ્‍હી, તા.૧૦: પ્રખ્‍યાત કોમેડિયન રાજુ શ્રીવાસ્‍તવ વિશે ચોંકાવનારા સમાચાર સામે આવ્‍યા છે. રાજુ શ્રીવાસ્‍તવને હાર્ટ એટેક આવ્‍યો છે. અચાનક બગડતી તબિયતના કારણે રાજુ શ્રીવાસ્‍તવને દિલ્‍હીની સરકારી હોસ્‍પિટલ એઈમ્‍સમાં દાખલ કરવામાં આવ્‍યા છે. તેના ભાઈ અને પીઆરઓએ પુષ્ટિ કરી છે કે કોમેડિયનને હાર્ટ એટેક આવ્‍યો હતો.

રાજુ શ્રીવાસ્‍તવ હોટલના જીમમાં વર્કઆઉટ કરી રહ્યો હતો. ટ્રેડમિલ પર કસરત કરતી વખતે તેને છાતીમાં દુખાવો થયો અને તે નીચે પડી ગયો. આ પછી રાજુ શ્રીવાસ્‍તવને તાત્‍કાલિક હોસ્‍પિટલમાં લઈ જવામાં આવ્‍યા હતા. રાજુના પીઆરઓ અજીત સક્‍સેનાનું કહેવું છે કે કોમેડિયન પાર્ટીના કેટલાક મોટા નેતાઓને મળવા માટે દિલ્‍હીમાં રોકાયો હતો. સવારે જીમ ગયો, જીમ કરતી વખતે તેને હાર્ટ એટેક આવ્‍યો. તેણે કહ્યું કે રાજુ શ્રીવાસ્‍તવની નાડી હવે પાછી આવી ગઈ છે. તેમની તબિયતમાં સુધારો થઈ રહ્યો છે. પીઆરઓએ હાસ્‍ય કલાકારના તમામ ચાહકોને રાજુના સ્‍વાસ્‍થ્‍ય માટે પ્રાર્થના કરવા વિનંતી કરી હતી.

કોમેડિયન વિશેના આ દુઃખદ સમાચારે ચાહકોને પરેશાન કરી દીધા છે. ચાહકો રાજુ શ્રીવાસ્‍તવના ઝડપથી સ્‍વસ્‍થ થવાની પ્રાર્થના કરી રહ્યા છે. રાજુ શ્રીવાસ્‍તવ એક પ્રખ્‍યાત કોમેડિયન છે. તેઓ ઉત્તર પ્રદેશ ફિલ્‍મ વિકાસ પરિષદના અધ્‍યક્ષ પણ છે.

રાજુ શ્રીવાસ્‍તવને કોમેડીનો બાદશાહ માનવામાં આવે છે. તેણે ઘણી ફિલ્‍મો અને ટીવી શોમાં કામ કર્યું છે. વર્ષોથી રાજુ શ્રીવાસ્‍તવ પોતાની કોમેડીથી લોકોને ગલીપચી કરી રહ્યા છે. રાજુ નાનપણથી જ કોમેડિયન બનવા માંગતો હતો. રાજુએ પોતાના કરિયરની શરૂઆત સ્‍ટેજ શોથી કરી હતી. શરૂઆતમાં રાજુએ બોલિવૂડ ફિલ્‍મોમાં નાના રોલ કર્યા હતા. તેને સ્‍ટેન્‍ડ અપ શો ‘ધ ગ્રેટ ઈન્‍ડિયન લાફ્‌ટર ચેલેન્‍જ' દ્વારા ખ્‍યાતિ મળી હતી. આ શોમાં રાજુ સેકન્‍ડ રનર અપ હતો.

તેનો સ્‍પિન-ઓફ શો ‘ધ ગ્રેટ ઈન્‍ડિયન લાફ્‌ટર ચેલેન્‍જ - ચેમ્‍પિયન્‍સ' રાજુએ જીત્‍યો અને તે કોમેડીનો કિંગ બન્‍યો. રાજુ બિગ બોસ ૩, નચ બલિયે ૬ જેવા રિયાલિટી શોનો પણ ભાગ હતો. રાજુ કોમેડી નાઈટ્‍સ વિથ કપિલમાં પણ જોવા મળ્‍યો હતો. રાજુ એક્‍ટર, કોમેડિયનની સાથે સાથે રાજકારણી પણ છે. તેઓ ૨૦૧૪માં ભાજપમાં જોડાયા હતા.

અમે પ્રાર્થના કરીશું કે બધાને હસાવનાર રાજુ જલ્‍દી સ્‍વસ્‍થ થઈ જાય. રાજુ શ્રીવાસ્‍તવ જલ્‍દી સ્‍વસ્‍થ થાઓ.