Gujarati News

નવી દિલ્હી, તા.૧૦ : ચોમાસુ સત્ર દરમિયાન, સરકાર વતી, કેન્દ્રીય ગૃહ રાજ્ય મંત્રી નિત્યાનંદ રાયે કહ્યું છે કે હાલમાં સરકારે રાષ્ટ્રીય સ્તરે એનઆરસીનો અમલ કરાવવા અંગે કોઈ નિર્ણય લીધો નથી. તેમના મતે, સરકારનો અત્યારે આવો કોઈ ઈરાદો નથી. સાંસદ નિલિખ ખડસેએ પૂછેલા સવાલના જવાબમાં રાય વતી આ જવાબ આપવામાં આવ્યો હતો.

તેમણે સરકાર પાસેથી જાણવા માંગ્યું કે શું સરકારે અનુસૂચિત જનજાતિઓનો અધિકૃત ડેટાબેઝ તૈયાર કરવા માટે અલગ એનસીઆર હાથ ધરવાનો પ્રસ્તાવ મૂક્યો છે.

તેના જવાબમાં રાયે કહ્યું કે આ અંગે કોઈ નિર્ણય લેવામાં આવ્યો નથી. તેમણે કહ્યું છે કે અત્યાર સુધી દેશમાં ગેરકાયદેસર રીતે રહેતા શરણાર્થીઓના કેન્દ્રીય સ્તરે કોઈ ડેટા ઉપલબ્ધ નથી. રોહિંગ્યા શરણાર્થીઓ દેશની સરહદોમાં પ્રવેશ્યા હોવાના પણ અહેવાલ છે. આ સાથે, એવા અહેવાલો પણ આવ્યા છે કે જેમાં તેઓ ખોટા કામમાં સામેલ છે.

તેને જોતા કેન્દ્રએ તમામ રાજ્યો અને કેન્દ્રશાસિત પ્રદેશોને આ દિશામાં સતર્ક રહેવા જણાવ્યું છે. કેન્દ્ર તરફથી કહેવામાં આવ્યું છે કે તેણે આ લોકોની ઓળખ માટે કાયદા અમલીકરણ એજન્સીઓ ઉપરાંત ગુપ્તચર એજન્સીઓની મદદ લેવી. અત્રે ઉલ્લેખનીય છે  કે એનસીઆર ના મુદ્દે ઘણો વિવાદ થયો છે. વિપક્ષ પણ આ અંગે સરકાર પર સવાલો ઉઠાવી રહ્યો છે.

આરએસએસના પૂર્વ વડા મોહન ભાગવતે પણ આ અંગે નિવેદન આપ્યું છે. તેમણે આસામની મુલાકાત દરમિયાન આ મુદ્દે સ્પષ્ટતા પણ કરી હતી. તેમણે કહ્યું કે સીએએ અને એનસીઆર નો કોઈ ધાર્મિક આધાર નથી. આ દરમિયાન તેમણે વિપક્ષી દળો પર પણ આકરા પ્રહારો કર્યા હતા. તેમણે કહ્યું કે વિપક્ષ આ મુદ્દે માત્ર પોતાના રાજકીય હિતોની જાળવણી કરી રહ્યો છે.

તેમણે એમ પણ કહ્યું કે તેઓ આ બંને કેસોને કોમી રંગ આપી રહ્યા છે અને લોકોને આ મુદ્દે ઉશ્કેરવાનું કામ કરી રહ્યા છે. ભાગવતે આ સમય દરમિયાન એ પણ સ્પષ્ટ કરી દીધું હતું કે આ નાગરિકતા કાયદાના અમલ પછી દેશના કોઈ મુસ્લિમને કોઈ નુકસાન નહીં થાય. આ માત્ર તે લોકો માટે છે જે ગેરકાયદે ભારતમાં રહીને દેશના સંસાધનોનો ઉપયોગ કરી રહ્યા છે.

આ દરમિયાન, તેમણે એનઆરસી અને સીએએ-આસામ અને ઇતિહાસની રાજનીતિ પર પુસ્તક સિટિઝનશિપ ડિબેટનું વિમોચન પણ કર્યું. ભાગવતે કહ્યું હતું કે આઝાદી પછી દેશની કમાન સંભાળનાર વડા પ્રધાન પંડિત જવાહરલાલ નહેરુએ કહ્યું હતું કે દેશમાં રહેતા તમામ લઘુમતી સમુદાયોનું ધ્યાન રાખવામાં આવશે.

આરએસએસ નેતાએ કહ્યું કે દેશની ભાજપ સરકાર પણ આને આગળ વધારવા માગે છે તેમણે એમ પણ કહ્યું કે જે દેશના નાગરિક છે તે દરેકને એનઆરસી વિશે જાણવાનો અધિકાર છે. અત્રે ઉલ્લેખનીય છે કે ઉત્તર પૂર્વીય રાજ્ય આસામમાં આ અંગે ભારે હંગામો થયો હતો. પશ્ચિમ બંગાળ સહિત અન્ય રાજ્યોમાં ખાસ કરીને બાંગ્લાદેશની સરહદે આવેલા રાજ્યોમાં આ મુદ્દે ઘણો હંગામો થયો હતો.