Gujarati News

લખનૌ તા. ૧૦ : ઉત્તર પ્રદેશના ઈટાવામાં એક ખાનગી રેસ્‍ટોરન્‍ટના મેનુ કાર્ડને લઈને હંગામો થયો છે. વાસ્‍તવમાં આ મેનુ કાર્ડમાં રાહુલ ગાંધીના નામની વાનગી જોવા મળી રહી છે. જેને લઈને કોંગ્રેસ દ્વારા એવી ચીમકી આપવામાં આવી છે કે જો તેના પર કાર્યવાહી નહીં કરવામાં આવે તો તેઓ ઉગ્ર આંદોલન કરશે. મેનુ કાર્ડમાં એક ઈટાલિયન વાનગી રાખવામાં આવી છે, જેનું નામ ‘ઈટાલિયન રાહુલ ગાંધી' લખેલું છે.

મેનૂ કાર્ડમાં ઈટાલિયન પાસ્‍તા, મેક્‍સિકન પાસ્‍તા, હેંગઓવર પાસ્‍તા જેવી વાનગીઓની નીચે ઈટાલિયન રાહુલ ગાંધી લખેલું છે. તેમાં ૯ પ્રકારની વાનગીઓ છે. આ અંગે કોંગ્રેસ તરફથી વાંધો ઉઠાવવામાં આવ્‍યો છે. ઇટાવા જિલ્લા કોંગ્રેસ સમિતિના હોદ્દેદારોએ આંદોલનની વાત કરી છે.

નોંધનીય છે કે આ ખાનગી રેસ્‍ટોરન્‍ટ ઇટાવાના પોલીસ સ્‍ટેશન સિવિલ લાઇન વિસ્‍તારમાં એક પાકું તળાવ હોવાનું જણાવવામાં આવી રહ્યું છે. આ રેસ્‍ટોરન્‍ટના મેનુ કાર્ડનો ફોટો સામે આવ્‍યા બાદ કોંગ્રેસીઓએ કાર્યવાહી કરવાની વાત કરી છે.

જિલ્લા કોંગ્રેસના તમામ હોદ્દેદારોએ કલેક્‍ટર કચેરીએ પહોંચી વરિષ્ઠ પોલીસ અધિક્ષકને આવેદનપત્ર આપ્‍યું હતું. જેમાં એવો આક્ષેપ કરવામાં આવ્‍યો છે કે મેનુ કાર્ડમાં રાહુલ ગાંધીના નામનો દુરૂપયોગ કરવામાં આવ્‍યો છે.