Gujarati News

Gujarati News

News of Friday, 10th June 2022

ઉત્તરપૂર્વમાં મુશળધાર વરસાદની ચેતવણી : હવામાન વિભાગ

અરુણાચલ પ્રદેશમાં 10 અને 11 જૂને અને આસામ અને મેઘાલયમાં આગામી પાંચ દિવસ સુધી મુશળધાર વરસાદ પડશે

ભારતીય હવામાન વિભાગ (IMD) એ ગુરુવારે જણાવ્યું હતું કે ચોમાસું સામાન્ય ગતિએ આગળ વધી રહ્યું છે અને આગામી બે દિવસમાં તે મહારાષ્ટ્ર પહોંચે તેવી શક્યતા છે. આ સાથે હવામાન કચેરીએ અરુણાચલ પ્રદેશમાં 10 અને 11 જૂને અને આસામ અને મેઘાલયમાં આગામી પાંચ દિવસ સુધી મુશળધાર વરસાદ થવાની ચેતવણી પણ આપી છે. નોંધપાત્ર રીતે દેશમાં વાર્ષિક વરસાદના 70 ટકા વરસાદ ચોમાસાના પવનોથી આવે છે અને તેને કૃષિ આધારિત અર્થવ્યવસ્થા માટે જીવનરેખા તરીકે ગણવામાં આવે છે.

આઈએમડીના વૈજ્ઞાનિક જેનામાનીએ જણાવ્યું હતું કે ચોમાસું 29 મેના રોજ કેરળના કિનારે પહોંચ્યું હતું અને 31 મે અને 7 જૂનની વચ્ચે દક્ષિણ અને મધ્ય અરબી સમુદ્ર, સમગ્ર કેરળ, કર્ણાટક અને તમિલનાડુના ભાગોમાં પહોંચ્યું હતું.

જેનામાનીએ પત્રકારોને જણાવ્યું હતું કે, ચોમાસામાં કોઈ વિલંબ નથી. આગામી બે દિવસમાં મહારાષ્ટ્ર પહોંચવાની શક્યતા છે અને આગામી બે દિવસમાં ચોમાસું મુંબઈ પહોંચશે. જેનામાનીએ જણાવ્યું હતું કે આગામી બે દિવસમાં ગોવા, મહારાષ્ટ્ર, કર્ણાટક, આંધ્રપ્રદેશ અને તમિલનાડુના કેટલાક ભાગોમાં ચોમાસું આગળ વધવા માટે સ્થિતિ અનુકૂળ છે. IMDએ ગયા મહિને અહેવાલ આપ્યો હતો કે આ વર્ષે દક્ષિણપશ્ચિમ ચોમાસું સામાન્ય રહેશે અને છેલ્લા 50 વર્ષની સરેરાશ 87 સેમીની સામે 103 ટકા વરસાદ પડશે.

(9:50 pm IST)