Gujarati News

નવી દિલ્હી, તા.૯ : ભારત સમક્ષ ઘૂંટણ ટેકવી દેવાની સ્થિતિમાં આવી ગયેલા પાકિસ્તાન તરફી આતંકવાદી સંગઠનોએ આતંક ફેલાવવાનો નવો રસ્તો શોધી કાઢ્યો છે. છેલ્લા ૩ વર્ષમાં કાશ્મીરમાં ચાર આતંકવાદી સંગઠનો જેકેએલએફ, લશ્કર-એ-તૈયબા, જૈશ-એ-મોહમ્મદ અને હિજબુલ મુજાહિદ્દીનના ટોચના કમાન્ડરો માર્યા ગયા પછી, તેઓ પ્રોક્સી અને હાઇબ્રિડ આતંકનો આશરો લઈ રહ્યા છે. નાગરિક અને આતંકવાદી બંને જીવન જીવતા લોકોને હાઇબ્રિડ આતંકવાદી નામ આપવામાં આવ્યું છે. હતાશામાં આવીને આતંકવાદી સંગઠનોએ આ પદ્ધતિ અપનાવી છે જેથી જમ્મુ અને કાશ્મીરમાં અશાંતિનું વાતાવરણ બનાવી શકાય.

હાઇબ્રિડ આતંકવાદીઓ સામાન્ય આતંકવાદીઓ કરતા અલગ હોય છે. તે સામાન્ય જીવન જીવે છે. તેઓ સામાન્ય લોકોની વચ્ચે રહેતા હોવાથી સુરક્ષા એજન્સીઓ માટે તેમને ટ્રેક કરવું મુશ્કેલ છે. અગાઉનો કોઈ ગુનાહિત રેકોર્ડ ન હોવાથી તેમની ઓળખ કરવી મુશ્કેલ છે. તેમને ટૂંકા ગાળાનો ક્રેશ કોર્સ આપવામાં આવે છે જેમાં હથિયારોની તાલીમ પણ આપવામાં આવે છે. આ આતંકવાદીઓ નેતાઓ સાથે વાત કરતા નથી, તેઓ કાગળમાં લખીને એકબીજાને સૂચનાઓ આપે છે.

આર્મીના જવાનો હવે પાયાના સ્તરે લોકોમાં પોતાની પકડ બનાવી રહ્યા છે. જો કોઈ પરિવારનો કોઈ સભ્ય પાકિસ્તાન અધિકૃત કાશ્મીરમાં આતંકવાદી તાલીમ લેવા જાય છે, અથવા જો કોઈ આતંકવાદી સંગઠન સાથે તેના સંબંધો જોવા મળે છે તો કડક કાર્યવાહી કરવામાં આવે છે. હાઇબ્રિડ આતંકવાદીઓ પાર્ટ ટાઇમ અથવા ફ્રીલાન્સ આતંકવાદીઓ તરીકે કામ કરે છે.

સેનાના એક અધિકારીના જણાવ્યા અનુસાર છેલ્લા કેટલાક વર્ષોમાં વિદેશી આતંકવાદીઓની સંખ્યામાં વધારો થયો છે. તેમની સામે લડવા માટે સુરક્ષા દળોએ ઘણી તૈયારીઓ કરવી પડી હતી. હવે લશ્કર અને જૈશ જેવા આતંકવાદી સંગઠનોએ વિદેશી આતંકવાદીઓને હાઇબ્રિડ આતંકવાદીઓ તૈયાર કરવાનું કામ સોંપ્યું છે.