Gujarati News

નવી દિલ્હી :હવામાં વિન્ડશિલ્ડમાં તિરાડ પડતાં સ્પાઈસ જેટનું વિમાન મુંબઈમાં લેન્ડ કરવામાં આવ્યું.એરલાઈને જણાવ્યું હતું કે ગુજરાતના કંડલાથી ઉડતું સ્પાઈસ જેટ પ્લેન મુંબઈમાં અગ્રતાક્રમે લેન્ડિંગ કરવામાં આવ્યું છે કારણ કે તેની બહારની વિન્ડશિલ્ડમાં મિડ એર ક્રેક જોવા મળ્યો હતો. સ્પાઈસ જેટના વિમાન સાથે દિવસમાં આ બીજી ઘટના છે. અધિકારીઓએ જણાવ્યું કે સ્પાઈસ જેટની કંડલા-મુંબઈ ફ્લાઈટ 23,000 ફૂટની ઊંચાઈએ હતી ત્યારે વિન્ડશિલ્ડનો બહારનો ભાગ તૂટી ગયો હતો.

એરલાઈને એક નિવેદનમાં કહ્યું કે તમામ મુસાફરો અને ક્રૂ મેમ્બર સુરક્ષિત છે. ડીજીસીએના એક અધિકારીએ જણાવ્યું હતું કે, “સ્પાઈસજેટના Q400 એરક્રાફ્ટને હવામાં વિન્ડશિલ્ડ ક્રેક થયા બાદ પ્રાથમિકતાના આધારે મુંબઈમાં લેન્ડ કરવામાં આવ્યું હતું.

એરલાઈને એક નિવેદનમાં જણાવ્યું હતું કે, “23,000 ફૂટની ઉંચાઈ પર મિડ-એર ફ્લાઈટ દરમિયાન P2 બાજુની વિન્ડશિલ્ડ આઉટરપેન તૂટી ગઈ હતી. આ સંબંધિત તમામ ચેકલિસ્ટ ક્રિયાઓ કરવામાં આવી હતી. દબાણ સામાન્ય હોવાનું જણાયું હતું. અગાઉના દિવસે, સ્પાઈસ જેટની દિલ્હી-દુબઈ ફ્લાઈટને ઈંધણ સૂચકમાં નિષ્ફળતાને કારણે મંગળવારે કરાચી તરફ વાળવામાં આવી હતી. આ માહિતી ઉડ્ડયન નિયામક ડિરેક્ટોરેટ જનરલ ઓફ સિવિલ એવિએશન (DGCA)ના અધિકારીઓએ આપી હતી. છેલ્લા 17 દિવસમાં સ્પાઈસ જેટ વિમાન સાથે સંકળાયેલી આ છઠ્ઠી ઘટના હતી. ડીજીસીએ મંગળવારની ઘટના સહિત તમામ છ ઘટનાઓની તપાસ કરી રહી છે. દિલ્હીથી દુબઈ જતી બોઈંગ 737 MAX ફ્લાઇટ જ્યારે હવામાં હતી ત્યારે વિમાનની ડાબી ટાંકીમાં બળતણની સામગ્રીમાં અસામાન્ય ઘટાડો નોંધાયો હતો, જેના કારણે પ્લેનને કરાચી તરફ વાળવાની ફરજ પડી હતી, અધિકારીઓએ જણાવ્યું કે જ્યારે કરાચી એરપોર્ટ પર તપાસ કરવામાં આવી ત્યારે ડાબી ટાંકીમાંથી કોઈ લીક જોવા મળ્યું ન હતું.