Gujarati News

નવી દિલ્‍હી તા. ૫ : તાજેતરના અઠવાડિયામાં, મોટાભાગની સ્‍થાનિક અને આંતરરાષ્ટ્રીય રેટિંગ એજન્‍સીઓએ ભારતના વિકાસ અનુમાનને ડાઉનગ્રેડ કર્યું છે. પરંતુ આ ચિત્રનું એક પાસું એ પણ છે કે વિકાસ દરના અંદાજમાં ઘટાડા છતાં વર્ષ ૨૦૨૨માં ભારતનો વિકાસ દર વિશ્વના અન્‍ય વિકસિત અને વિકાસશીલ દેશોની સરખામણીમાં સૌથી વધુ હોઈ શકે છે. આટલું જ નહીં, પ્રથમ વખત ભારતનો આર્થિક વિકાસ દર ચીન કરતા ઘણો વધારે રહેવાની શક્‍યતા છે.

જૂનમાં જાહેર કરાયેલા વિશ્વ બેંકના રિપોર્ટ અનુસાર આ વર્ષે ચીનનો વિકાસ દર ૪.૩ ટકા રહેશે જયારે ભારતનો વિકાસ દર ૭.૫ ટકા રહેશે. એ જ રીતે, IMFના રિપોર્ટમાં એમ પણ કહેવામાં આવ્‍યું છે કે ભારતનો વિકાસ દર ચીન કરતા વધુ ઝડપથી વધી રહ્યો છે.

હાલમાં જ આરબીઆઈ દ્વારા જાહેર કરવામાં આવેલા માસિક રિપોર્ટમાં કહેવામાં આવ્‍યું છે કે યુક્રેન-રશિયા યુદ્ધ બાદ વિશ્વના અન્‍ય દેશોની જેમ ભારતીય અર્થવ્‍યવસ્‍થા પર પણ વિપરીત અસર થશે. પરંતુ એવું પણ માનવામાં આવે છે કે ભારત અન્‍ય દેશોની સરખામણીમાં ઝડપથી વિકાસ કરશે. ભારતની સરખામણી રશિયા, ચીન, બ્રાઝિલ અને દક્ષિણ આફ્રિકા જેવા દેશો સાથે કરવામાં આવી છે.

આમાં ઓર્ગેનાઈઝેશન ફોર ઈકોનોમિક કોઓપરેશન એન્‍ડ ડેવલપમેન્‍ટ (OECD) અને વિશ્વ બેંકના અહેવાલનો તુલનાત્‍મક અભ્‍યાસ રજૂ કરવામાં આવ્‍યો છે. OECD એ ભારતનો વિકાસ અનુમાન ૮.૧ ટકાથી ઘટાડીને ૬.૯ ટકા કર્યો છે, જયારે વિશ્વ બેન્‍કે તેને ૮.૭ ટકાથી ઘટાડીને ૭.૫ ટકા કર્યો છે.

આ એજન્‍સીઓએ ચીન માટે અનુમાન અનુક્રમે ૫.૧ થી ૪.૪ ટકા અને ૫.૧ થી ૪.૩ ટકા ઘટાડ્‍યું છે. એ જ રીતે, નવા IMF રિપોર્ટમાં કહેવામાં આવ્‍યું છે કે ભારતનો વિકાસ દર ૯ ટકાથી ઘટાડીને ૮.૨ કરવામાં આવશે, જયારે ચીનનો વિકાસ દર ૫.૧ થી ઘટાડીને ૪.૪ ટકા કરવામાં આવ્‍યો છે.