Gujarati News

લખનઉ, તા. ૫ :. ઉત્તર પ્રદેશના મુખ્યમંત્રી યોગી આદિત્યનાથે ગઈકાલે કોરોના વાયરસનો પ્રથમ ડોઝ લીધો હતો. લખનઉની સિવીલ હોસ્પીટલમાં સીએમ યોગીએ ભારત બાયોટેકની કોવેકસીનનો પ્રથમ ડોઝ લીધો હતો અને આ દરમિયાન તેમને લોકોને કોરોના વેકસીન લગાવવાની અપીલ પણ કરી હતી. આ અપીલના અંતમાં તેમનાથી અપશબ્દ બોલાય જતા તે અંગેનો વિડીયો સોશ્યલ મીડીયામા ભારે ચર્ચા જગાવી રહ્યો છે અને લોકો અલગ અલગ પ્રકારની કોમેન્ટ કરી રહ્યા છે.

ગઈકાલે કોરોના વાયરસની રસી લીધા બાદ એએનઆઈ સાથેની વાતચીતમાં તેમણે ઉત્તર પ્રદેશમાં તેમણે કોરોના વેકસીન વિનામૂલ્યે ઉપલબ્ધ કરાવવા બદલ વડાપ્રધાન મોદી અને સ્વાસ્થ્ય મંત્રાલયનો આભાર વ્યકત કર્યો હતો. તેમણે દેશના વૈજ્ઞાનિકોને પણ આ વિડીયો થકી અભિનંદન આપ્યા હતા.

આ અભિનંદન આપ્યાના થોડી મિનીટો પછી એએનઆઈના પત્રકારનું માઈક દૂર ચાલ્યુ જતા તેમણે અપશબ્દ બોલી પોતાની નારાજગી વ્યકત કરી હતી. એવુ જણાય છે કે તેમને વધુ બોલવાની ઈચ્છા હતી પરંતુ માઈક આઘુ ચાલ્યુ જતા તેમણે પોતાની નારાજગી વ્યકત કરી હતી અને તેમનાથી જીભ લપસી ગઈ હતી. આ અપશબ્દવાળો વિડીયો હાલ સોશ્યલ મીડીયામાં જોરશોરથી વાયરલ થઈ રહ્યો છે. લોકો અલગ અલગ પ્રકારની કોમેન્ટ કરી રહ્યા છે કે ભગવાધારીને આવુ બોલવુ શોભા દયે છે?