Gujarati News

નવી દિલ્‍હી, તા.૪: મણિપુરમાં રહેતી ૧૧ વર્ષની બાળકીની તસવીર રવિવારે સોશિયલ મીડિયા પર વાયરલ થઈ હતી. તેની તસવીર જોઈને સૌની આંખમાં પાણી આવી ગયા હતા. મીનિંગ્‍સિનલિઉ પમેઈ નામની બાળકી માત્ર ૧૧ વર્ષની છે. તેના પર પોતાના દૂધ પીતા ભાઈને સાચવવાની જવાબદારી છે. તે જવાબદારી ઉઠાવવા તૈયાર છે અને સાથે ભણવા પણ માગે છે. એટલે જ તે પોતાના નાનકડા ભાઈને લઈને સ્‍કૂલે જાય છે. ૧૧ વર્ષની મીનિંગ્‍સિનલિઉ પમેઈના ખોળામાં એક નાનકડું બાળક છે. તે ખુરશીમાં બેઠી છે અને ડેસ્‍ક પર રાખેલી નોટમાં લખી રહી છે. ખોળામાં રહેલું બાળક તેનો નાનો ભાઈ જે ઊંદ્યી રહ્યો છે.

આ બાળકી સુદુર જેલિયાંગ્રોંગ નાના-બહુલ તામેંગલોંગ જિલ્લાની રહેવાસી છે. તેના માતાપિતા ખેતરોમાં મજૂરી કામ કરવા જાય છે. તે ડેલોંગ ગામમાં સ્‍વાયત્ત જિલ્લા પરિષદ સંચાલિત સ્‍કૂલ ડેલોંગ પ્રાથમિક વિદ્યાલયમાં પહેલા ધોરણમાં અભ્‍યાસ કરે છે.

મીનિંગ્‍સિનલિઉ ચાર ભાઈ-બહેનોમાંથી સૌથી મોટી છે. માતાપિતા કામે જાય ત્‍યારે ઘર અને નાના ભાઈ-બહેનોની જવાબદારી તેના શિરે આવે છે. તે પોતાના નાના ભાઈ-બહેનોના ભરોસે સૌથી નાના ભાઈને મૂકીને સ્‍કૂલે નથી જઈ શકતી માટે તેને પણ સાથે લઈ જાય છે. બાળકી સ્‍કૂલ યુનિફોર્મ પહેરી, દફતર ભરાવી અને પોતાના દૂધ પીતા ભાઈને તેડીને ચાલીને સ્‍કૂલ જાય છે.

બાળકીની ભણવા માટેની લગની જોઈને લોકો તેના ખૂબ વખાણ કરી રહ્યા છે. મુખ્‍યમંત્રી એન. બિરેન સિંહે ચાઈલ્‍ડ હેલ્‍પલાઈનની ટીમને બાળકીના ઘરે મોકલી હતી. આ ટીમે બાળ સંરક્ષણ યોજના અંતર્ગત બાળકીને મદદ કરી છે. પરિવારને તાત્‍કાલિક રાહત આપવા માટે તેમને રાશન પણ આપવામાં આવ્‍યું છે. કેબિનેટ મંત્રી બિસ્‍વજીત સિંહે બાળકી ગ્રેજયુએટ થાય ત્‍યાં સુધી તેના અભ્‍યાસનો ખર્ચ ઉઠાવવાની જવાબદારી લીધી છે. મણિપુરના રોંગમેઈ નાગા છાત્ર સંગઠન (RNSOM)એ આ બાળકીના પરિવારને ૧૦,૦૦૦ રૂપિયાની આર્થિક મદદ કરી છે.