Gujarati News

કરાચી તા. ૨૯ : પાકિસ્‍તાનના કરાચીથી એક મોટા સમાચાર સામે આવ્‍યા છે. અજાણ્‍યા હુમલાખોરોએ અહીં અંધાધૂંધ ગોળીબાર કર્યો હતો. ફાયરિંગની આ ઘટનામાં એક ચીની નાગરિકનું મોત થયું હતું. જયારે બે અન્‍ય લોકો ઘાયલ થયા હતા. પોલીસે આ અંગે માહિતી આપી હતી. પોલીસે જણાવ્‍યું હતું કે હુમલાખોરોએ કરાચી નજીક ડેન્‍ટલ ક્‍લિનિકમાં ઘૂસીને આ ઘટનાને અંજામ આપ્‍યો હતો. પોલીસે જણાવ્‍યું કે હુમલાખોરો દર્દી હોવાનો ડોળ કરીને ક્‍લિનિકમાં ઘૂસ્‍યા હતા. આ દરમિયાન તેણે અંધાધૂંધ ગોળીબાર કર્યો હતો. આંતરરાષ્ટ્રીય સમાચાર અહીં વાંચો.

ડોન સમાચારના અહેવાલ મુજબ, એસએસપી (દક્ષિણ) અસદ રઝાએ જણાવ્‍યું કે હુમલાખોરો કરાચીના સદર વિસ્‍તારના ક્‍લિનિકમાં દર્દી હોવાનો ઢોંગ કરીને પ્રવેશ્‍યા હતા. તેમણે કહ્યું કે ફાયરિંગની આ ઘટનામાં એક વ્‍યક્‍તિનું મોત થયું છે અને એક મહિલા સહિત બે લોકો ઘાયલ થયા છે, જેમને સારવાર માટે હોસ્‍પિટલમાં દાખલ કરવામાં આવ્‍યા છે. તેણે જણાવ્‍યું કે તમામ ચીનના નાગરિક હતા.

પોલીસે જણાવ્‍યું કે હુમલાનો ભોગ બનેલા લોકોની ઓળખ રોનાલ્‍ડ રેમન્‍ડ ચાઉ (૨૫), મારગડે (૭૨) અને રિચર્ડ (૭૪) તરીકે થઈ છે. પોલીસે જણાવ્‍યું કે બંને ઘાયલોને પેટમાં ગોળી વાગી છે અને તેમની હાલત ગંભીર છે. આ ઘટના બાદ સિંધના મુખ્‍યમંત્રી મુરાદ અલી શાહે હુમલાખોરોની તાત્‍કાલિક ધરપકડ કરવાનો આદેશ આપ્‍યો હતો. તેમણે કહ્યું કે આવી ઘટનાઓને સહન કરી શકાય નહીં. કરાચી ઉપરાંત તેણે આઈજીપી પાસેથી પણ વિગતવાર રિપોર્ટ માંગ્‍યો છે.

આ હુમલો કોણે કર્યો, તેની માહિતી હાલ સામે આવી નથી, પરંતુ બલૂચ લિબરેશન આર્મી પર શંકા વ્‍યક્‍ત કરવામાં આવી રહી છે. ચીની નાગરિકો પર હુમલા માટે પાકિસ્‍તાન હંમેશા BLAને જવાબદાર ગણાવે છે. BLAએ કરાચી યુનિવર્સિટીમાં થયેલા બોમ્‍બ વિસ્‍ફોટની જવાબદારી પણ લીધી હતી. આ વિસ્‍ફોટમાં ત્રણ ચીની નાગરિકોના મોત થયા હતા. તે જ સમયે, નિષ્‍ણાતોનું માનવું છે કે બલૂચિસ્‍તાનમાં આતંકવાદીઓ મજબૂત થઈ રહ્યા છે અને પાકિસ્‍તાન વિરુદ્ધ દરરોજ નવા ષડયંત્ર રચી રહ્યા છે.