Gujarati News

નવી દિલ્હી: આપણને બધાને આઈસ્ક્રીમ ખાવાનો શોખ હોય છે, પરંતુ કેટલાક લોકો શોખ પૂરો કરવાના પ્રયાસમાં હદ બહાર જાય છે. આવો જ વિચિત્ર કિસ્સો કેનેડામાં જોવા મળ્યો હતો. નાના શહેરની વચ્ચે, પાયલોટે આઈસ્ક્રીમ ખાવા માટે હેલિકોપ્ટરનું ઈમરજન્સી લેન્ડિંગ કર્યું. પરંતુ, તેને પોતાનો શોખ પૂરો કરવો ભારે પડ્યો. પોલીસે પાયલોટ વિરુદ્ધ ગેરકાયદે ઉતરાણ માટે કેસ નોંધ્યો છે. 31 જુલાઇના રોજ, ટિસડેલના રહેવાસીઓએ શહેરની એકમાત્ર ડેરી ક્વીન પાસે પાર્કિંગ વિસ્તારમાં લાલ હેલિકોપ્ટર ઉતરતા જોયું, તે ઉતરતા જ ધૂળ અને કાટમાળના વાદળ છવાઈ ગયા. શરૂઆતમાં, કેટલાક લોકોએ ભૂલથી તેને એર એમ્બ્યુલન્સ સમજ્યું, કારણ કે તેનો રંગ તબીબી કટોકટી માટે ઉપયોગમાં લેવાતા પ્રાંતીય એર એમ્બ્યુલન્સ જેવો હતો. જ્યારે સ્થળ પર હાજર ટિસડેલના મેયરે લાલ રંગનું હેલિકોપ્ટર જોયું ત્યારે તેઓ સમજી ગયા કે તે એર એમ્બ્યુલન્સ છે. સત્તાવાળાઓએ જાહેર કરેલા ફોટામાં પાર્કિંગ એરિયાની વચ્ચે લાલ રંગનું હેલીકૉપટર જોઈ શકાય છે. ડેરી ક્વીનની ઓળખ ડાબી બાજુ દેખાય છે. પાયલોટનું આ અનોખું પરાક્રમ સોશિયલ મીડિયા પર હેડલાઇન્સ બનાવી રહ્યું છે.