મોડાસા નેશનલ હાઇવે નજીકથી પોલીસે બાતમીના આધારે ટ્રકમાં લવતો 12 લાખની કિંમતનો દારૂનો જથ્થો ઝડપી પાડ્યો
મોડાસા: નેશનલ હાઈવે નં.૮ ના વાંટડા ટોલ પ્લાઝા નજીકથી પસાર થતી રાજસ્થાન પાસીંગની આઈશર ટર્બો ટ્રકમાં ભરેલા ૩૫૦ ખાલી કેરેટની આડમાં છુપાવી રાજયમાં ઘુસાડાતા રૂ.૭,૬૨,૦૦૦ ની કિંમતના વિદેશી દારૂ-બીયરના જથ્થા સાથે બે પરપ્રાંતીય ઈસમોને ઝડપી પડાયા હતા.જિલ્લા એલસીબી પોલીસે ટ્રકમાં ભરેલ ૪૯૮૦ બોટલોના જથ્થા સહિત કુલ રૂ.૧૨,૭૨,૫૦૦ નો મુદ્દામાલ કબ્જે કરી ૩ આરોપી વિરૂધ્ધ પ્રોહીબીશન એકટ હેઠળ ગુનો નોંધી કાયદેસરની કાર્યવાહી હાથ ધરી હતી.
દિવાળીનો તહેવાર હવે નજીકમાં આવી રહયો છે.પરપ્રાંત રાજસ્થાન,હરીયાણામાંથી વિદેશી દારૂનો મોટો જથ્થો દારૂ પ્રતિબંધીત ગુજરાતમાં ઘુસાડવા બુટલેગરો ટાંપીને બેઠા છે જેવી તક મળે કે તુરંત ટ્રકો ભરી રાજયમાં દારૂ મંગાવનાર પણ વધ્યા છે.અને પોલીસ દ્વારા આવો કેટલોય ગેરકાયદેસર જથ્થો જીવના જોખમે ઝડપી પણ પડાય છે.અરવલ્લી જિલ્લા એલસીબી પોલીસ ઈન્સ્પેકટર આર.કે.પરમાર ને મળેલ બાતમીના આધારે ટીમ દ્વારા નેશનલ હાઈવે પર ના વાંટડા ટોલ પ્લાઝા નજીક નાકાબંધી ગોઠવવામાં આવી હતી.દરમ્યાન રાજસ્થાન તરફથી આવી રહેલ ગાડીને અટકાવી ચેકીંગ હાથ ધરાયું હતું.આ આઈશર ટર્બો ગાડી ના પાછળના ભાગે ખાલી કેરેટ ભરેલા હતા.