Gujarati News

અમદાવાદ,તા.૨૧ : પતિથી કંટાળેલી ૩૮ વર્ષીય પત્નીએ પ્રેમી અને મિત્રો સાથે મળીને તેની હત્યા કરી નાખી. અમદાવાદ ક્રાઈમ બ્રાંચે બુધવારે ૩૮ વર્ષીય મહિલા, ૧૯ વર્ષીય બોયફ્રેન્ડ અને તેમના ૨૨ વર્ષીય મિત્રની હત્યાના ગુનામાં ધરપકડ કરી છે. ૧૭ જુલાઈએ મહિલાએ આ બંને સાથે મળીને બેરોજગાર પતિનું કાસળ કાઢી નાખ્યું હતું. કારંજમાં ભદ્રકાળી મંદિર પાસે ફૂટપાથ રહેતી રેખા સોલંકી ૧૯ વર્ષના સાબિર પઠાણ અને ૨૩ વર્ષના રાજુ ડામોર સાથે પ્રેમ સંબંધ ધરાવે છે. આ બંને યુવકો પણ રેખા સાથે ફૂટપાથ પર જ રહેતા હતા તેમ પોલીસનું કહેવું છે. કચરો વીણવાનું કામ કરતી રેખાએ ગત અઠવાડિયે પોતાના પ્રેમીઓને કહ્યું કે, તે પતિ જિજ્ઞેશ સોલંકીથી છૂટકારો મેળવવા માગે છે. જિજ્ઞેશ રેખાના બધી જ કમાણી ઉડાવી દેતો હતો. રેખાની વાત સાંભળીને તેના પ્રેમીઓ હત્યા કરવા તૈયાર થઈ ગયા અને પછીથી બાકીનું જીવન સાથે વિતાવાનો પ્લાન પણ બનાવ્યો.

    જિજ્ઞેશની હત્યા માટે તેમણે ૨૨ વર્ષીય શિવમ ઠક્કર નામના બીજા એક શખ્સનો સંપર્ક કર્યો. આ તમામે ગળું દબાવીને જિજ્ઞેશની હત્યા કરવાનું કાવતરું ઘડ્યું હતું. ૧૭ જુલાઈએ રેખા, સાબિર, રાજુ અને શિવમ એલિસબ્રિજ પાસે રિવરફ્રંટના પૂર્વ કિનારા તરફ ભેગા થયા. અહીં તેમણે ભોજન કર્યું અને દારુ પીધો હતો. બાદમાં તેઓ જિજ્ઞેશ પાસે ગયા અને તેને એલિબ્રિજ લઈ આવ્યા. અહીં રેખા, તેના બે પ્રેમીઓ અને સાગરિત શિવમે જિજ્ઞેશને માર માર્યો અને પછી દોરડાથી ગળું દબાવીને તેની હત્યા કરી નાખી હતી. જિજ્ઞેશનો મૃતદેહ વિક્ટોરિયા ગાર્ડન પાસે ફેંકીનો તેઓ ત્યાંથી ફરાર થઈ ગયા હતા. ગાયકવાડ હવેલી પોલીસે હત્યાનો ગુનો નોંધીને કેસની તપાસ ક્રાઈમ બ્રાંચને સોંપી હતી. હ્યુમન ઈન્ટેલિજન્સની મદદથી ક્રાઈમ બ્રાંચના અધિકારીઓએ રેખા, સાબિર અને શિવમને ઝડપી પાડ્યા છે જ્યારે રાજુ ડામોરની શોધખોળ ચાલુ છે.