Gujarati News

મુંબઇ તા. ૨૩ : ગુજરાત વિધાનસભાની ચૂંટણી પહેલા ભાજપ વિરુદ્ઘ 'વિકાસ ગાંડો થયો છે'નું સુત્ર આપનાર અમદાવાદના સાગર સાવલિયા(૨૧)ને પાટીદાર અનામત આંદોલન સમિતીમાંથી કાઢી મુકવામાં આવ્યો છે.

સાગર સાવલિયા પાછલા જુલાઈ, ૨૦૧૭થી હાર્દિક પટેલની સોશિયલ મીડિયા ટીમમાં કામ કરતો હતો. રવિવારે થયેલી સોશિયલ મીડિયા સેલ મીટિંગમાં તેને બોલાવવામાં નહોતો આવ્યો. જયારે સાગરને આ વિષે પુછવામાં આવ્યું તો તેણે જણાવ્યું કે, હવે તે પાટીદાર સમિતીનો ભાગ નથી.

સાગરે પોતાના સોશિયલ મીડિયા અકાઉન્ટ પર રોષ વ્યકત કરતાં લખ્યું છે કે, જે પણ હાર્દિક વિરુદ્ઘ બોલે છે તેને ભાજપની વ્યકિત માની લેવામાં આવે છે. હું કોઈ પણ પાર્ટી સાથે સંકળાયેલો નથી, પરંતુ હાર્દિકે યાદ રાખવું જોઈએ કે તે પોતે પણ ભાજપ સાથે જોડાયેલો હતો.

સાવલિયા જણાવે છે કે, ભાજપના ગુજરાતના વિકાસ મોડલ પર પ્રહાર કરતા વિકાસ ગાંડો થયો છે મીમની પાછળ હું હતો. પરંતુ હવે હું હાર્દિકની પારદર્શિતા પર સવાલ કરી રહ્યો છું. આ પહેલા પણ જયારે હાર્દિકે કોંગ્રેસનું સમર્થન કરવાની જાહેરાત કરી હતી ત્યારે પણ સાગરે હાર્દિક સામે સવાલ ઉઠાવ્યા હતા.

સાગરે જણાવ્યું કે, હું સાયબર ટીમનો હેડ હતો અને પાસ નેતાઓએ ઘણી વાર મારું નામ પણ મેન્શન કર્યું છે. મેં હાર્દિક સામે સવાલ ઉઠાવ્યા તે કારણે કદાચ મારા પર પગલાં લેવામાં આવ્યા હોઈ શકે. જે લોકો હાર્દિકના કામ પર સવાલ ઉઠાવે છે, ઉદાહરણ તરીકે વરુણ પટેલ(જે ભાજપમાં જોડાયો છે), તેમને પાસમાંથી કાઢી મુકવામાં આવે છે.

આ આરોપો પર હાર્દિક પટેલે જણાવ્યું કે, સાગર હેડ નહોતો. તેણે મારી સામેના અંગત વાંધાને કારણે પ્રશ્નો ઉઠાવાવના શરુ કર્યા હતા. હું આગામી દિવસોમાં મારી ટીમને વધારે મજબૂત બનાવીશ.(૨૧.૧૦)