Gujarati News

હિંમતનગર : હિંમતનગર-અમદાવાદ નેશનલ હાઇવે  ૮ પર સાબરદાણ ફેકટરી નજીકથી શુક્રવારની મધરાતે પુરઝડપે બાઈક લઈ નિકળેલા યુવકનું બાઈક સર્વિસ રોડ પર ઉભા રહેલા પાણીના ટેન્કર સાથે ટકરાતા જીવલેણ અકસ્માત સર્જાયો હતો. અકસ્માતની આ ઘટનામાં બાઈક ચાલક તેમજ પાછળ બેઠેલા બે યુવકોના ઘટના સ્થળ પર જ કરૂણ મોત થયા હતા.

 આ બનાવની જાણ હિંમતનગર એ.ડીવીજન પોલીસ સ્ટેશનમાં થતા પોલીસે ઘટના સ્થળે પહોંચી મૃતક બન્ને યુવકોની લાશને હિંમતનગર સીવીલ હોસ્પિટલમાં મોકલી આપી કાયદેસરની કાર્યવાહી કરી હતી. રામલાલ કાળુભાઈ કટારા (રહે. માથુગામડા પાલ, તા.જી.ડુંગરપુર-રાજસ્થાન) બાઈક પર કશરૂભાઈ નારાયણભાઈ મનાત (રહે. પાદરડી અહાડા, તા.જી. ડુંગરપુર-રાજસ્થાન)ને પાછળ બેસાડી અમદાવાદ તરફથી રાજસ્થાન જવા મોડી રાત્રે નીકળ્યા હતા. રાત્રીના ૧ થી ૧.૩૦ વાગ્યાના સુમારે પુરઝડપે જઈ રહેલા બાઈક ચાલકે સાબરદાણ ફેકટરી નજીકના સર્વિસ રોડ પર ઉભા રાખેલા પાણીના ટેન્કર સાથે બાઈક ટકરાવતા ગંભીર અકસ્માત સર્જાયો હતો. અકસ્માતની આ ઘટનામાં રામલાલ કાળુભાઈ કટારા (ઉ.વ. ૨૧)અને કશરૂભાઈ નારાયણભાઈ મનાત (ઉ.વ.૨૮) ને માથા તેમજ શરીરના ભાગે ગંભીર ઈજાઓ પહોંચતા બન્ને યુવકોના ઘટના સ્થળ પર જ કરૂણ મોત થયા છે.