Gujarati News

છેલ્લા થોડા સમયથી ગુજરાત એસટીની બસો ગ્રામ્યવિસ્તારોમાં સળગાવી નાખવાની ઘટનાઓ વધતાં એસટીએ ડ્રાઇવરો અને કન્ડકટરોને ઓર્ડર કર્યો છે કે તેમણે બસ પાર્ક કરીને બહાર સૂવાને બદલે ફરજિયાત બસમાં જ સૂવાનું રહેશે. આ ઓર્ડર આવ્યા પછી હવે ગુજરાતભરની એસટીની બસના ડ્રાઇવરો અને કન્ડકટરો એવી મૂંઝવણમાં મુકાયા છે કે જેમણે નુકસાન જ કરવું છે અને તોફાનો જ કરવાં છે તેઓ ડ્રાઇવર અને કન્ડકટર સહિતની બસ પણ સળગાવી શકે છે તો એ લોકોની સુરક્ષાની જવાબદારી કોની રહેશે? આ બાબતમાં બધાએ રજૂઆત કરી છે, પણ આ બાબતનો જવાબ આવ્યો નથી અને એ જવાબ આવે એ પહેલાં જ સૌકોઇએ નિયમનો અમલ કરવાનો હોવાથી ડ્રાઇવરો અને કન્ડકટરો નાછૂટકે બસમાં સૂવા તૈયાર પણ થઇ ગયા છે. ડ્રાઇવર અને કન્ડકટરે બસમાં જ સૂવાનું અમલમાં મૂકી દીધું છે, પણ તેઓ સીટનો ઉપયોગ કરવાને બદલે બસની અંદર ખાટલા ચડાવે છે અને ખાટલાને સીટ સાથે બાંધીને સૂએ છે. પોતાની સાથે ખાટલો લઇને રવાના થનારા આ ડ્રાઇવરો અને કન્ડકટરો સવાર પડે એટલે પોતપોતાના ખાટલા બસની ઉપર ચડાવી દે છે અને રાત પડે એટલે એ ખાટલા નીચે ઉતારીને ફરીથી બસની અંદર ગોઠવીને, સીટ સાથે બાંધીને આરામ કરી લે છે.