Gujarati News

ગાંધીનગર:જિલ્લામાં આમ તો ઘણા સમયથી જુગારની પ્રવૃતિ ફુલીફાલી હતી ત્યારે હવે શ્રાવણ મહિનો આવતાની સાથે તેમાં વધારો થયો છે ત્યારે પોલીસ બાતમીદારોને સક્રિય કરી ઠેકઠેકાણે જુગારધામો ઉપર દરોડા પાડી રહી છે. ત્યારે સે-ર૧ પોલીસની ટીમે બાતમીના આધારે બોરીજના નવાપરા ખાતે દરોડો પાડીને બોરીજ નવાપરામાં રહેતા બાબુજી મલાજી ઠાકોર, દિનેશ પ્રહલાદજી દંતાણી, અરજણજી ઉર્ફે અજલો શંભુજી ઠાકોર, મગોડીમાં રહેતા જીગ્નેશ યશવંતભાઈ બારોટ અને સર્કીટ હાઉસ સ્ટાફ કવાર્ટસના મકાન નં.૩પ/૧૨માં રહેતા રાજુભાઈ ફુલબહાદુર સોનીને જુગાર રમતાં ઝડપી પાડયા હતા અને તેમની પાસેથી ૧૦૮૦૦ની રોકડ કબ્જે કરી હતી. બીજી બાજુ પેથાપુર પોલીસે બાતમીના આધારે મોટી આદરજના અંધારીયા પરામાં દરોડો પાડીને મોટી આદરજમાં રહેતા રવાજી ગફુરજી ઠાકોર, સુરેશજી આતાજી ઠાકોર, કલ્પેશજી ગાંડાજી ઠાકોર, દશરથજી જીણાજી ઠાકોર, પ્રવીણજી કલાજી ઠાકોર અને નટવરજી જેતીજી ઠાકોરને જુગાર રમતાં ઝડપી પાડયા હતા. જેમની પાસેથી ૧૧ર૪૦ની રોકડ કબ્જે કરવામાં આવી હતી. જયારે વાસણ ગામમા પણ જુગાર રમાતો હોવાની બાતમીના પગલે દરોડો પાડી વાસણ ગામના રજુજી કચરાજી વાઘેલા, જુજારસિંહ તખતસિંહ ચાવડા, ઈન્દ્રજીતસિંહ રોહિતસિંહ વાઘેલા, મહેન્દ્રસિંહ ઘનશ્યામસિંહવાઘેલા, ઉનાવાના રાજેન્દ્રજી પ્રહલાદજી વીહોલ અને નરેન્દ્રસિંહ રામસિંહ સોલંકીને જુગાર રમતાં ઝડપી પાડયા હતા. જેમની પાસેથી ૧૦૬૫૦ની રોકડ કબજે કરીને કાયદેસરની કાર્યવાહી હાથ ધરવામાં આવી હતી. કોરોના કાળમાં જુગાર રમવા બદલ જુગારીઓ સામે જાહેરનામાં ભંગનો ગુનો પણ દાખલ કરવામાં આવ્યો હતો.