Gujarati News

અમદાવાદ, તા.૯ : શહેરના ચાંગોદર વિસ્તારમાં એક ફેક્ટરીનો કર્મચારીઓ રોકડ રકમ લઈને જઈ રહ્યો હતો.

આ દરમિયાન કેટલાક લૂંટારુંઓએ તેને માર મારી ૪૪ લાખની લૂંટ ચલાવીને ફરાર થઈ ગયા હતા. જોકે પોલીસે ગણતરીના કલાકોમાં જ લૂંટારુઓને પકડી પાડ્યા અને લૂંટની રકમ પણ રિકવર કરી લીધી છે.

પોલીસના જણાવ્યા મુજબ ચાંગોદરમાં આવેલી એક પાન મસાલાની ફેકટરીમાં કામ કરતા સંદીપ બલીરામ યાદવ રાત્રે આઠ વાગે બાઈક લઈને નીકળ્યો હતો. સંદિપ બાઈક પર બેસી ચાંગોદર રેલવે ફાટક પાસેથી પસાર થતો હતો. તે સમયે છ જેટલા અજાણ્યા શખસોએ તેના બાઈકને રોકી હુમલો કર્યો હતો. તેને માર મારી તેની પાસેથી ૪૪.૫૦ હજારની રોકડ ભરેલો થેલો લઈ ગયા હતા. લૂંટની ઘટના બાદ સંદિપે તુરંત પોલીસને જાણ કરી.

લાખો રૂપિયાની લૂંટની ઘટના સામે આવતા પોલીસ તુરંત એક્શનમાં આવી. પોલીસે ટીમ તૈયાર કરી સમગ્ર વિસ્તારમાં તપાસ હાથ ધરી રસ્તાઓ પર નાકાબંધી ગોઠવી અને માત્ર ચાર કલાકમાં જ લૂંટ કરનારા વિક્કી સહિત તેના સાગરીતોની ધરપકડ કરી લીધી. તેમજ તેમની પાસેથી લૂંટની રકમ પણ રિકવર કરી ગુનાનો ભેદ ઉકેલી દીધો છે. આરોપીઓ સામે ગુનો નોંધી તેમણે આ પહેલા કોઈ લૂંટ ચલાવી છે કે નહીં તે અંગે પણ પુછપરછ કરવામાં આવી રહી છે.