Gujarati News

મુંબઇ, તા.૧૫: આમિર ખાનની મોસ્ટ અવેટેડ ફિલ્મ 'લાલ સિંહ ચઢ્ઢા'નું લદ્દાખમાં શૂટિંગ ચાલી રહ્યું છે. અહીં ફિલ્મની ટીમ સાથે કિરણ રાવ પણ છે. આમિર અને કિરણ લદ્દાખમાં છે ત્યારે તેમના ફેનપેજ પર સતત અપડેટ મળતી રહે છે. હાલ સોશિયલ મીડિયા પર આમિર ખાન અને કિરણના વિડીયો વાયરલ થઈ રહ્યા છે જેમાં તેઓ ડાન્સ કરતા જોવા મળે છે.

વિડીયોમાં જોઈ શકો છો કે આમિર અને કિરણ લદ્દાખના પરંપરાગત વસ્ત્ર કોસ અને સાલમામાં જોવા મળે છે. આમિર અને કિરણ સ્થાનિકો સાથે નાચતા જોવા મળે છે. તેઓ લદ્દાખી નૃત્ય ગોમ્બા સુમ્શક કરતાં જોવા મળી રહ્યા છે. વિડીયોમાં જોઈ શકો છો કે એક સ્થાનિક મહિલા ડાન્સના સ્ટેપ બતાવી રહી છે અને આમિર-કિરણ તેની અનુસરી રહ્યા છે.

આમિર અને કિરણના આ વિડીયોની સાથે બીજો એક વિડીયો પણ વાયરલ થઈ રહ્યો છે. જેમાં કેટલાક બાળકો ફિલ્મના સેટ પર ડાન્સ કરતા દેખાઈ રહ્યા છે અને તેમની સાથે આમિર ખાન પણ થીરકતો દેખાઈ રહ્યો છે.

થોડા દિવસ પહેલા જ આમિર ખાન અને ફિલ્મ 'લાલ સિંહ ચઢ્ઢા'ની ટીમ પર લદ્દાખના એક ગામમાં કચરો ફેલાવાનો આરોપ લાગ્યો હતો. સોશિયલ મીડિયા પર એક વિડીયો વાયરલ થયો હતો જેમાં દાવો કરાયો હતો કે ફિલ્મની ટીમે ગંદકી ફેલાવી છે. ત્યારબાદ આમિર ખાન પ્રોડકશન હાઉસ (AKP)એ નિવેદન જાહેર કરીને કહ્યું હતું, “AKP સ્પષ્ટ કરી દેવા માગે છે કે, કંપની તરીકે અમે જયાં પણ શૂટિંગ કરવા જઈએ ત્યાં સ્વચ્છતાના પ્રોટકોલનું પાલન કરવામાં કડક વલણ ધરાવીએ છીએ. અમારી એક ટીમ છે જે સુનિશ્યિત કરી છે કે, લોકેશન હંમેશા કચરામુકત હોય. દિવસના અંતે લોકેશનની ફરીવાર ચેક કરવામાં આવે છે. આખું શિડ્યુલ પૂરું થાય પછી અમે સુનિશ્યિત કરીએ છીએ કે જયારે લોકેશન છોડીએ ત્યારે જે પ્રકારે સ્વચ્છ અમને મળ્યું હતું તેવું અથવા તેનાથી વધુ ચોખ્ખું કરીને જઈએ. અમારા પર આરોપો લાગી રહ્યા છે અથવા અફવા ઉડાવામાં આવી છે કે અમે લોકેશનને ગંદુ કર્યું છે. અમે આ દાવાઓને મક્કમતાથી નકારીએ છીએ. અમારું લોકેશન તપાસ માટે કાયમ ખુલ્લું છે, સ્થાનિક અધિકારીઓ ગમે તે સમયે આવીને તપાસ કરી શકે છે.

જણાવી દઈએ કે, જુલાઈ મહિનાની શરૂઆતમાં જ આમિર ખાન અને કિરણે એક જોઈન્ટ સ્ટેટમેન્ટ આપીને ડિવોર્સ લેવાની જાહેરાત કરી હતી. ડિવોર્સ પછી પણ તેઓ દીકરા આઝાદને સાથે મળીને ઉછેરશે અને પાની ફાઉન્ડેશન તેમજ બીજા કેટલાક ફિલ્મ પ્રોજેકટમાં સાથે મળીને કામ કરશે તેમ સ્ટેટમેન્ટમાં કહેવાયું હતું. આમિર અને કિરણે ૧૫ વર્ષના લગ્નજીવનનો અંત આણ્યો છે. 'લાલ સિંહ ચઢ્ઢા'ની વાત કરીએ તો, કિરણ રાવ આ ફિલ્મની પ્રોડ્યુસર છે. ફિલ્મમાં આમિર સાથે કરીના કપૂર લીડ રોલમાં છે. કરીનાએ બીજી પ્રેગ્નેન્સી દરમિયાન જ તેના ભાગનું શૂટિંગ પૂરું કરી નાખ્યું હતું. આ ફિલ્મ આ વર્ષે ક્રિસમસ પર રિલીઝ થઈ શકે છે.