Mukhy Samachar

News of Friday, 21st April, 2017

ATM ફરી ખાલી : રોકડનો ઉપાડ નોટબંધી પહેલાંના સ્‍તરે પહોંચ્‍યો

કરન્‍સીની સપ્‍લાય ૮ નવેમ્‍બર અગાઉના પ્રમાણ કરતાં લગભગ ૫૦% મોટાભાગના એટીએમ પર ‘નો કેશ'ના પાટીયા

ATM ફરી ખાલી : રોકડનો ઉપાડ નોટબંધી પહેલાંના સ્‍તરે પહોંચ્‍યો

      મુંબઇ તા. ૨૧ : છેલ્લાં કેટલાંક સમયથી ATM ‘ખાલી' હોવાની બૂમોએ ફરી જોર પકડ્‍યું છે. ઘણા ATM પર ‘નો કેશ'ના પાટિયા લટકે છે ત્‍યાર પ્રશ્ન એ થાય કે, નોટબંધીને ખાસ્‍સો સમય વીતી ગયો હોવા છતાં અત્‍યારે આવી સ્‍થિતિ કેમ? વાસ્‍તવમાં ATMમાંથી ઉપાડ નોટબંધી અગાઉના સ્‍તરે પહોંચી ગયો છે, પણ કરન્‍સીનો સપ્‍લાય ૮ નવેમ્‍બર અગાઉના સ્‍તર કરતાં લગભગ ૫૦ ટકા છે.

      નેશનલ પેમેન્‍ટ્‍સ કોર્પોરેશન ઓફ ઇન્‍ડિયાના ડેટા પ્રમાણે માર્ચ મહિનામાં ATMમાંથી ઉપાડ રૂા. ૧ લાખ કરોડના આંકડાને વટાવી ગયો હતો, જે ગયા વર્ષના ઓક્‍ટોબર મહિનાના સ્‍તરે હતો. માર્ચનો આંકડો ડિસેમ્‍બરની તુલનામાં બમણો અથવા લગભગ રૂ.૫૦,૦૦૦ કરોડ વધારે છે. હિટાચી પેમેન્‍ટ સર્વિસિસના એમડી લોની એન્‍ટનીએ જણાવ્‍યું હતું કે, ‘ATM ઉપાડની મર્યાદા દૂર થયા પછી અમને જણાયું હતું કે, દરેક ટ્રાન્‍ઝેક્‍શનની રકમ સરેરાશ રૂ. ૪,૦૦૦ થઈ હતી, જે નોટબંધી પહેલાંના ગાળા જેટલી છે. નવેમ્‍બરથી ફેબ્રુઆરીના ગાળામાં આ આંકડો સરેરાશ ટ્રાન્‍ઝેક્‍શનનો આંકડો રૂ.૨,૦૦૦ હતો.' તેમણે વધુમાં જણાવ્‍યું હતું કે,‘માંગમાં વૃદ્ધિ છતાં અમને બેન્‍કો પાસે કરેલી માંગણીનો માત્ર ૫૦ ટકા હિસ્‍સો જ મળી રહ્યો છે અને એટલે મશીનો ખાલી છે.'

      ઉલ્લેખનીય છે કે, નોટબંધીના થોડા સમય પછી કરન્‍સીની સ્‍થિતિ મહદ્‍અંશે થાળે પડી ગઈ હતી, પણ છેલ્લા કેટલાક સપ્તાહથી ફરી ATM ખાલી દેખાઈ રહ્યાં છે. ડિજિટલ પેમેન્‍ટ પર બેન્‍કો દ્વારા ફી લેવાતી હોવાની ફરિયાદને પગલે લોકોએ ફરી જૂની આદત પ્રમાણે રોકડ વાપરવાનું શરૂ કર્યું છે. વધુમાં આરબીઆઇ બેન્‍કોને બ્રાન્‍ચ અને ATMs વચ્‍ચે રોકડના યોગ્‍ય મેનેજમેન્‍ટની સલાહ આપી રહી છે. NPCI ડેટા પ્રમાણે ઓક્‍ટોબરમાં ATMsમાંથી ઇન્‍ટરઓપરેબલ રોકડ ઉપાડની કુલ રકમ રૂ.૧.૧ લાખ કરોડ હતી. તેના માટે લગભગ ૩૦ કરોડ ટ્રાન્‍ઝેક્‍શન થયા હતા. ડિસેમ્‍બરમાં આ આંકડો રૂ.૪૮,૪૨૦ કરોડ હતો, જે જાન્‍યુઆરીમાં રૂ.૮૫,૪૮૦ કરોડે પહોંચ્‍યો હતો.કોઈ એક બેન્‍કનો ગ્રાહક અન્‍ય બેન્‍કના ATM પર કાર્ડ સ્‍વાઇપ કરે ત્‍યારે એ ટ્રાન્‍ઝેક્‍શન નેશનલ ફાઇનાન્‍શિયલ સ્‍વિચ (NFS) દ્વારા રુટ થાય છે.

      જેનું મેનેજમેન્‍ટ નેશનલ પેમેન્‍ટ્‍સ કોર્પોરેશન ઓફ ઇન્‍ડિયા દ્વારા કરવામાં આવે છે. NPCI દ્વારા જારી થયેલા ડેટા પ્રમાણે ડિસેમ્‍બરની તુલનામાં માર્ચમાં સ્‍વાઇપ આઉટ થયેલા નાણાંનું પ્રમાણ બેવડાયું છે. ATMમાં રોકડની તંગી છે, પણ તે દેશના અમુક ભાગોમાં જ છે.

      RBIનો ડેટા સૂચવે છે કે, ફેબ્રુઆરીમાં ડેબિટ કાર્ડ દ્વારા થયેલો કુલ ઉપાડ રૂ.૧.૯ લાખ કરોડ હતો. ડિસેમ્‍બરમાં આ આંકડો રૂ.૧.૯ કરોડ અને ઓક્‍ટોબરમાં રૂ.૨.૫ લાખ કરોડ હતો. તે વૃદ્ધિનો ટ્રેન્‍ડ દર્શાવે છે. RBIએ હજુ માર્ચ મહિનાના આંકડાની જાહેરાત કરી નથી.

       

 (04:16 pm IST)
 

Share This News

Facebook
Twitter
Blogger
 

Follow Akilanews.com

Facebook
Twitter
YouTube
RSS