vividh-vibhag

News of Monday, 3rd July, 2017

સરકારી મહેમાન

ગુજરાત સરકારમાં ‘સિનિયર મોસ્ટ’ IASની છેલ્લી એક્ઝિટ 2019માં; અઢી વર્ષમાં બીજા બાર નિવૃત્ત

મિશન-2017: હારી ચૂકેલા નેતાઓ લાઇનમાં, યુવા લોહીને રોકી રહ્યાં છે : આદેશ છૂટ્યાં- સરકારના વિકાસ માટે સોશ્યલ મિડીયાનો વિકાસ કરો : ગંગારામ અલોરિયા સરકારને કહે છે- મારો વાંક શું, મારો ગુનો શું છે

ગુજરાત સરકારમાં ‘સિનિયર મોસ્ટ’ IASની છેલ્લી એક્ઝિટ 2019માં; અઢી વર્ષમાં બીજા બાર નિવૃત્ત

      ગુજરાત કેડરના સિનિયર મોસ્ટ આઇએએસ ઓફિસરોની વયનિવૃત્તિનો સમય છે. 2019 સુધીમાં વધુ 11 ઓફિસરો નિવૃત્ત થઇ રહ્યાં છે. સમય સમય બી બલવાન, નહીં મનુષ્ય બલવાન- એ કહેવત ઓફિસરોની નિવૃત્તિ સાથે જોડી શકાય તેવી છે. હા, જરૂરિયાત હોય અને સરકારની ગુડબુકમાં હોય તેવા અધિકારીઓ નિવૃત્તિ પછી વર્ષો સુધી સરકારમાં કોન્ટ્રાક્ટથી ફરજ બજાવી રહ્યાં છે. ગુજરાત કેડરના પાવરફુલ અને સિનિયર કહી શકાય તેવા ત્રણ આઇએએસ ઓફિસરો પૈકી પાવર સેક્રેટરી પી.કે.પુજારી જૂનમાં નિવૃત્ત થઇ ગયા છે. તેઓ દિલ્હીમાં ફરજ બજાવતા હતા. જ્યારે કોર્પોરેટ અફેર્સ સેક્રેટરી તપન રે સપ્ટેમ્બરમાં અને વોટર રિસોર્સિગ સેક્રેટરી અમરજીત સિંઘ નવેમ્બરમાં નિવૃત્ત થાય છે. બીજી તરફ દિલ્હીમાં ફરજ બજાવતા રેવન્યુ સેક્રેટરી અને જીએસટીના પ્રણેતાઓ પૈકીના એક હસમુખ અઢિયા નવેમ્બર 2018માં, કોમર્સ સેક્રેટરી રિટા તેવટીયા જુલાઇ 2018 અને ગુજરાતના હોમ ડિપાર્ટમેન્ટના એસીએસ એમ.એસ.ડાગુર જુલાઇ 2018માં નિવૃત્ત થાય છે. 2019માં રાજગોપાલ જાન્યુઆરીમાં, એ.એમ. તિવારી જૂનમાં, સુજીત ગુલાટી, ગિરીશચંન્દ્ર મુર્મુ અને પ્રેમકુમાર ગેરા નવેમ્બરમાં અને સંજયપ્રસાદ સપ્ટેમ્બરમાં વયનિવૃત્ત થાય છે.

      જૂના જોગી ટીકીટ માટે ફરી લાઇનમાં...

      ભાજપમાં નવું લોહી આવ્યું છે અને જૂનું લોહી કોર્નર કરીને બેઠું છે. 2017માં એવા લોહી માટે ફરી આશા જાગી છે. પાર્ટીમાં જેઓ ફેકાઇ ગયેલા છે તેમને અમિત શાહ ફરીથી ટીકીટ આપે છે કે કેમ તે મોટો પ્રશ્ન છે. આ ચહેરાઓ કે જેઓ લાઇમ લાઇટમાં નથી. મોટા ચહેરાઓ જોઇએ તો જયનારાયણ વ્યાસ, જસુબેન કોરાટ, ભરત બારોટ, બિમલ શાહ, ગોરધન ઝડફિયા, કૌશિક પટેલ, આઇકે જાડેજા, સૌરભ પટેલ, જયસિંહ ચૌહાણ, મહેન્દ્ર ત્રિવેદી અને વલ્લભ કથિરીયા. આ તમામ કેબિનેટમાં રહી ચૂકેલા ચહેરા છે. 2017માં જો ભાજપની સરકાર બનાવવી હોય તો નવી યંગ ટીમની સાથે સાથે કેટલાક સિનિયર સાથીદારોની પણ પાર્ટીને જરૂર પડવાની છે તેથી પાર્ટી સૂત્રોના મતે આ ચહેરાઓને 2017માં વિધાનસભાની ચૂંટણી માટેની ટીકીટ મળે તેવી પ્રબળ શક્યતા જોવામાં આવી રહી છે. સાચુ જ કહ્યું છે કે- રાજકારણ કદી ઘરડું થતું નથી અને નેતા કદી રિટાયર્ડ થતો નથી.

      આ છે ભાજપના બાહુબલી નંબર વન...

      માત્ર ફિલ્મોમાં જ નહીં,  ભારતના રાજકારણમાં પણ બાહુબલી છે. પહેલાં એવું કહેવાતું હતું કે બાહુબલી ઉત્તરપ્રદેશમાં જ જન્મે છે પરંતુ હવે તેવું નથી. ગુજરાતમાં પણ જન્મે છે. ભાજપના રાષ્ટ્રીય અધ્યક્ષ અમિત શાહ એ ગુજરાતમાંથી દિલ્હી ગયેલા બાહુબલી છે. શક્તિશાળી રાષ્ટ્રીય નેતા તરીકે તેઓ ઉભરી આવ્યા છે. તેમના માટે એવું કહી શકાય છે કે ...જો બોલતે હૈ, વો કરતે હૈ... નરેન્દ્ર મોદી પાસે આ બાહુબલી છે, જો કે કોંગ્રેસમાં શંકરસિંહ વાઘેલાને પણ બાહુબલી જ કહી શકાય છે, કેમ કે તેમણે 1995માં સરકાર તોડી 1997માં કોઇનું સીએમ પદ છીનવી લીધું હતું. ગોત્ર તો ભાજપનું જ છે. યાદ રહે કે અટલ બિહારી વાજપેયી સાથે પણ પ્રમોદ મહાજન નામના બાહુબલી હતા.

      બ્યુરોક્રેસીમાં શંકરસિંહ વાઘેલા લોકપ્રિય છે...

      ગુજરાતની બ્યુરોક્રેસી ભાજપને જાણે છે, શું તે કોંગ્રેસને અને તેમના નેતાઓને જાણે છે તેવો પ્રશ્ન પૂછીએ તો જવાબ મળે, થોડાં થોડાં... કોંગ્રેસના શક્તિશાળી નેતા શંકરસિંહ વાઘેલા છે અને તેઓ અગાઉ ચીફ મિનિસ્ટર બની ચૂક્યા છે તેથી તેમને બ્યુરોક્રેસીમાં સિનિયર આઇએએસ સાથે સીધો સંપર્ક છે. સૌથી વધુ ઓફિસરો શંકરસિંહ વાઘેલાને ઓળખતા હશે. વિરોધપક્ષના નેતા હોવાથી તેઓ ડાયરેક્ટ વાત પણ કરી શકે છે. ભૂતકાળમાં અમરસિંહ ચૌધરી જ્યારે વિપક્ષના નેતા હતા ત્યારે તેઓ ચીફ સેક્રેટરી અને અન્ય ઓફિસરો સાથે પ્રોટોકોલ પ્રમાણે સીધી વાત કરતા હતા. આશ્ચર્ય એ થાય છે કે વિપક્ષનું પદ કેબિનેટ મિનિસ્ટર રેન્કનું છે છતાં આ પદનો ઉપયોગ વિપક્ષના નેતા કરતા હોતા નથી.

      કોંગ્રેસને સત્તાના મદમાં પાવરટુલ્સની ખબર ન પડી...

      વર્ષો સુધી સત્તામાં રહ્યાં છતાં કોંગ્રેસને એ ખબર ન પડી કે સરકારી સાધનો અને સંસ્થાઓનો આટલો બઘો પાવરફુલ ઉપયોગ થતો હોય છે. આજે સૌથી વધુ જો ચર્ચામાં હોય તો તે એન્ફોર્સમેન્ટ ડિરેક્ટોરેટ, ઇન્કમટેક્સ, સેન્ટ્રલ બ્યુરો ઓફ ઇન્વેસ્ટિગેશન જેવી સંસ્થાઓ છે. વિરોધીઓને સાફ કરવામાં વપરાતી આ સત્તાનો ઉપયોગ ભાજપ હરપળે કરી રહ્યું છે. જે વિપક્ષ મજબૂત હોય તેને કોઇને કોઇ કાંડમાં સપડાવી દેવાનું કોઇ ભાજપના નેતાઓ પાસે શિખે... કોંગ્રેસના શાસનમાં ઉપયોગ થતો ન હતો તેવું નથી પરંતુ તે મર્યાદિત હતો. ઘણાં નેતાઓને કાયદાનું ભાન ન હતું. આજે કાયદો આગળ કરીને ભલભલા ચમરબંધીને પણ મહાત કરી શકવાની શક્તિ ભાજપે કેળવી લીધી છે.

      વિકાસ માટે સોશ્યલનો મિડીયા વિકાસ કરો...

      કેન્દ્રની મોદી સરકાર અને ગુજરાતની રૂપાણી સરકારે કરેલા કામોને લોકો સુધી પહોંચાડવા કેબિનેટના મંત્રીઓ, સંસદસભ્યો, ધારાસભ્યો, પ્રદેશના નેતાઓ અને વિવિધ મોરચાના ઓફિસ બેરર્સને આદેશ આપવામાં આવ્યો છે. નવી દિલ્હીમાં નક્કી થયેલી ફોર્મ્યુલા પ્રમાણે ગુજરાત એકમને આ મહત્વની જવાબદારી સોંપવામાં આવી છે. સરકાર અને સંગઠન વચ્ચે સંકલન જાળવીને પ્રજાપયોગી કાર્યોની પ્રસિદ્ધિ થાય તે માટે વડાપ્રધાન નરેન્દ્ર મોદી અને પાર્ટીના રાષ્ટ્રીય અધ્યક્ષ અમિત શાહે સીધી સૂચનાઓ આપી છે. આ આદેશના પગલે ગુજરાતના માહિતી વિભાગને પણ સોશ્યલ મિડીયાથી સજ્જ બનાવવામાં આવ્યું છે. ખાસ કરીને પોપ્યુલર સાઇટ્સ- ફેસબુક, ટ્વિટર, ઇસ્ટાગ્રામ, વોટ્સઅપ, લિંક્ડઇન અને મોબાઇલ ફોનના એસએમએસ દ્વારા લોકો સાથે સંપર્ક બનાવી રાખવા કહેવામાં આવ્યું છે.

      કર્મયોગી તાલીમ હવે વિસરાઇ ચૂકી છે...

      ગુજરાતમાં 2003માં શરૂ થયેલી કર્મયોગીની તાલીમ વિસરાતી જાય છે. મોદીના દિલ્હી ગયા પછી કર્મયોગીની તાલીમ આપવા માટેનું એવું મજબૂત તંત્ર રહ્યું નથી, પરિણામે સરકારી કચેરીઓમાં રાબેતા મુજબ હોતી હૈ ચલતી હૈ...નો માહોલ જોવા મળી રહ્યો છે. સચિવાલયમાં ફાઇલોની મુવમેન્ટ ધીમી પડી છે. નવા આવેલા કર્મચારીઓને ફાઇલમાં નોટીંગ કેવી રીતે કરવું તેનું જ્ઞાન ઓછું છે તેથી ફાઇલ ચર્ચામાં મૂકી રાખવાના કિસ્સા વધી રહ્યાં છે. સચિવાલયમાં અરજદારોના ધક્કા વધી ગયા છે. એકનું એક કામ લઇને લોકો અવારનવાર આવે છે. આ સ્થિતિ બદલાશે નહીં તો એક દિવસ એવો આવશે કે તેની ગંભીર અસર સરકારના વહીવટી તંત્ર પર થશે. સરકારી યોજનાની પૂર્તિ માટે પહેલાં જે આદેશ અપાતા હતા તેનું પાલન ત્વરીત ગતિએ થતું હતું પરંતુ હવે એવું રહ્યું નથી. ગાંધીનરથી છૂટેલા આદેશને જિલ્લાનું વહીવટી તંત્ર ઘોળીને પી જાય છે અને ફાઇલ મહિનાઓ સુધી મૂકી રાખવાની આદત શરૂ થઇ છે જે પહેલાં બનતું ન હતું.

      હવે તો નેતાઓના ડુપ્લિકેટ આવવા લાગ્યા છે...

      ભારતમાં ફિલ્મસ્ટારોની જેમ નેતાઓની નકલ થવા લાગી છે. નકલ જેની થાય છે તેવા નેતાઓના લિસ્ટમાં નરેન્દ્ર મોદી ટોપ ઉપર છે. તેમના જેવો પહેરવેશ, તેમના જેવી દાઢી, તેમના જેવા ચશ્મા, તેમના જેવા જૂતાં, તેમના જેવા માસ્ક, તેમના જેવી વાણી... બઘું જ કોપી થાય છે... નરેન્દ્ર મોદીના ડુપ્લિકેટની સંખ્યા ભારતમાં છ ના આંકડે પહોંચી છે. તો બિહારમાં લાલુપ્રસાદની જેમ નિતીશકુમાર પણ પ્રિય છે. બીજાક્રમે લાલુ પ્રસાદની નકલ કરનારા લોકોની સંખ્યા પણ વધી રહી છે. ઉત્તર પ્રદેશમાં માયાવતીના ચાહકો છે, તામિલનાડુમાં જયલલીથાના ચાહકો હતા, તો મુલાયમના મખમલીતો ન કહેવાય, તોફાની ચાહકો જોવા મળે છે. અખિલેશના ડુપ્લિકેટ પણ ઉત્તરપ્રદેશમાં ફરે છે. અરવિંદ કેજરીવાલની નકલ કરનારા કલાકારો ડઝનબંધ છે. જો કે અમિત શાહના અવાજની નકલ થાય છે પણ તેમના જેવું શરીર ધરાવતા ડુપ્લિકેટ હજી ભારતની ગલીઓમાં જોવામાં આવ્યા નથી.

      પોલીસ ઓફિસરોની ટ્રાન્સફર થવાની શક્યતા...

      ગુજરાતના સિનિયર પોલીસ અધિકારીઓને પ્રમોશન આપ્યા પછી તેમની બદલીની શક્યતા વધી ગઇ છે. આ બદલીઓ રથયાત્રા હોવાથી પેન્ડીંગ રાખવામાં આવી હતી પરંતુ હવે રથયાત્રા શાંતિથી પૂર્ણ થઇ છે તેથી તેવા પોલીસ ઓફિસરો બદલાઇ રહ્યાં છે. ગયા મહિને સરકારે જે ઓફિસરોને પ્રમોશન આપ્યા છે તે ઓફિસરો શમશેરસિંહ, મનોજ અગ્રવાલ, બ્રજેશ જહા, અજય ચૌધરી, અભય ચૂડાસમા સહિતના ઓફિસરોની બદલી થઇ શકે છે. આ સાથે કેટલાક સુપ્રિટેન્ડેન્ટ ઓફ પોલીસની પણ બદલીઓની સંભાવના નકારી શકાતી નથી.

      એક ઓફિસર વિભાગને લાઇવ બનાવે છે...

      ગુજરાતના સિનિયર આઇએએસ ઓફિસર પંકજકુમાર જ્યાં જાય ત્યાં લાઇવ ડિપાર્ટમેન્ટ થઇ જાય છે. નરેન્દ્ર મોદી ગુજરાતના મુખ્યમંત્રી હતા ત્યારે તેઓ સીએમઓમાં કામ કરતા હતા. તેમની પાસે માહિતીનો વિભાગ હતો. તેમણે માહિતીના અધિકારીઓને દોડતા કરી દીધા હતા. તેઓ એસટી નિગમમાં આવ્યા તો એસટીના કર્મચારીઓને દોડતા કર્યા હતા. તેમણે આરોગ્ય વિભાગને પણ લાઇવ બનાવી દીધો હતો અને હવે રેવન્યુ વિભાગને તેઓ લાઇવ કરી રહ્યાં છે. લોકોને પડતી હાલાકીઓનો સોશ્યલ મિડીયા થકી તેઓ નિકાલ કરાવવા માગે છે તેથી રાજ્યના 33 જિલ્લા કલેક્ટરોના ટ્વિટર એકાઉન્ટ તેમણે ખોલાવી દીધા છે. ગુજરાત સરકારમાં સોથી વધુ લાઇવ અને ટેકનોસાવી ઓફિસરની યાદીમાં પંકજકુમાર નંબર વન છે. સરકારના વિવિધ વિભાગોના વડા એવા આઇએએસ ઓફિસરો જો આ રીતે લાઇવ થાય તો ગુજરાતનું કલ્યાણ થઇ શકે..!

      ગંગારામ અલોરિયા કેમ સેટ ન થયા...

      ગુજરાત સરકારમાં વહીવટીય રીતે સર્વોચ્ચ પદ એટલે ચીફ સેક્રેટરીનું કહેવાય છે. સીએમ પછી સીએસ સરકારના સુપ્રિમો હોય છે. ગુજરાતમાં છેલ્લા કેટલાક વર્ષોથી એવો સિરસ્તો રહ્યો છે કે ચીફ સેક્રેટરીના પદ પરથી નિવૃત્ત થતાં આઇએએસ ઓફિસરને નિવૃત્તિ પછીનું પોસ્ટીંગ મળતું હોય છે. અત્યાર સુધીમાં સાત ચીફ સેક્રેટરીને આ પોસ્ટીંગ મળ્યા છે જેમાં જી. સુબ્બારાવ, સુધીર માંકડ, ડી.રાજગોપાલન, પી.કે.લહેરી, ડો. મંજૂલા સુબ્રમણ્યમ, એ.કે.જોતિ, વરેશ સિંહા, ડી.જે.પાંડિયનનો સમાવેશ થાય છે પરંતુ છેલ્લે નિવૃત્ત થયેલા ગંગારામ અલોરિયા કોઇપણ પોસ્ટીંગથી વંચિત છે. સરકારે તેમને કોઇ પોસ્ટીંગ આપ્યું નથી. હજી પણ સાત પૈકી પાંચ ઓફિસરો કોઇને કોઇ સુપ્રિમ જગ્યાએ સરકારમાં ફરજ બજાવે છે. અલોરિયાને ઇચ્છા હતી કે તેઓ નિવૃત્તિ પછી સરકારમાં કામ કરે પરંતુ ભાજપની સરકારે કેમ પોસ્ટીંગ આપ્યું નથી તે સચિવાલયના વિભાગોમાં તપાસનો વિષય બન્યો છે. કોઇ કહે છે કે સીએમઓ સાથે તેમનું ટ્યુનિંગ સારૂ રહ્યું ન હતું તેથી તેમને સેટ કરી શકાયા નથી.

      સરકારી મહેમાન

      આલેખન

      ગૌતમ પુરોહિત

      gpurohit09@gmail.com

       

 (09:07 am IST)
 

Share This News

Facebook
Twitter
Blogger
 

Follow Akilanews.com

Facebook
Twitter
YouTube
RSS