Mukhy Samachar

News of Friday, 17th February, 2017

નોટબંધી પછી લોકોએ જરૂર કરતાં વધુ પ્રમાણમાં રોકડ સંઘરવા માંડી

અછત સર્જાશે એવા ભયે લોકોની સંગ્રહખોરી વધી

   મુંબઇ તા. ૧૭ : એટીએમમાંથી તમને હજુ રોકડા મળતા ન હોય તો કદાચ તમારી બેન્‍કનો વાંક નથી પરંતુ રોકડની સંગ્રહખોરી કરતા લોકો તેના માટે જવાબદાર હોઈ શકે છે. નવેમ્‍બર અને ડિસેમ્‍બરની સરખામણીમાં અત્‍યારે સિસ્‍ટમમાં અનેક ગણાં વધારે નાણાં છે છતાં કેટલીક જગ્‍યાએ એટીએમમાંથી નાણાં મેળવવામાં મુશ્‍કેલી પડે છે. નોટબંધીની જાહેરાત અગાઉ સિસ્‍ટમમાં જે નાણાં હતાં તેની સરખામણીમાં ૮૦થી ૮૫ ટકા રોકડ સિસ્‍ટમમાં ફરી આવી ગઈ છે. છતાં રોકડની અછત સર્જાશે તેવા ભયે લોકો રોકડનો સંગ્રહ કરી રહ્યા છે અને અમુક જગ્‍યાએ નાણાંની તંગી પેદા થાય છે.

   એનસીઆર કોર્પોરેશનના ઇન્‍ડિયા સર્વિસ જનરલ મેનેજર આનંદ ગરોલુએ જણાવ્‍યું કે, એટીએમમાં પાંચસો રૂપિયાની નોટો જમા કરવામાં આવે કે તરત લોકો નાણાં ઉપાડવા લાઇન લગાવે છે અને રોકડની જરૂર ન હોય તો પણ રૂપિયા ઉપાડતા રહે છે. મારા માનવા પ્રમાણે લોકોમાં હજુ ભયનું વાતાવરણ છે જેને સામાન્‍ય થતાં અમુક સપ્તાહ લાગી શકે છે. ગરોલુએ કહ્યું કે ૮ નવેમ્‍બર અગાઉની સરખામણીમાં એટીએમમાં હજુ પણ વધારે લોકો આવી રહ્યા છે. અગાઉ કોઈ એટીએમમાં રોજના ૧૨૦ ગ્રાહકો જતા હતા તો હવે તે સંખ્‍યા ૧૩૦થી ૧૪૦ જેટલી હોય છે. અગાઉ કરતાં ૧૦ ટકા વધારે ગ્રાહકો એટીએમમાં જાય છે.

   બજારમાંથી ૫૦૦ અને ૧,૦૦૦ રૂપિયાની નોટો પરત ખેંચાયા પછી એટીએમમાં નવી નોટ ભરવાનું પ્રમાણ ૭૧ ટકા સુધી ઘટી ગયું હતું. હવે મોટી ચલણી નોટોનું પ્રમાણ ૬૫ ટકા જેટલું છે અને જાન્‍યુઆરીના અંત પછી સ્‍થિતિ સુધરી છે.સિક્‍યોરવેલ્‍યૂ ઇન્‍ડિયા મારફત એટીએમમાં રોકડ જમા કરાવતી એજન્‍સી એજીએસ ટેક્‌નોલોજિસના મેનેજિંગ ડિરેક્‍ટર રવિ ગોયલે કહ્યું કે, ફેબ્રુઆરી ૨૦૧૭ના અંત સુધીમાં સપ્‍લાય એકદમ નોર્મલ થઈ જવાની શક્‍યતા છે. નોટબંધીની જાહેરાત પછી રિઝર્વ બેન્‍કે એટીએમ ઉત્‍પાદકોની એક સ્‍પેશિયલ ટીમ રચી હતી જેની સાથે કેશ લોજિસ્‍ટિક કંપનીઓને પણ સામેલ કરવામાં આવી હતી. તેમને નવી નોટ માટે એટીએમ મશીનને રિકેલિબ્રેટ કરવાનું કામ સોંપાયું હતું. જૂની નોટની સરખામણીમાં નવી ચલણી નોટો ૨૦ ટકા જેટલી નાની છે. ગોરુલુએ જણાવ્‍યું કે ઉઘોગના સિન્‍ક્રોનાઇઝ્‍ડ પ્રયાસો તથા નિયમનકાર દ્વારા ચુસ્‍ત નજર રાખવાના કારણે એટીએમ નેટવર્ક થોડા જ સમયમાં કામ કરતું થયું હતું.

 (12:55 pm IST)
 

Share This News

Facebook
Twitter
Blogger
 

Follow Akilanews.com

Facebook
Twitter
YouTube
RSS