Mukhy Samachar

News of Wednesday, 13th September, 2017

ચિંતાજનક સ્‍થિતિઃ ઔદ્યોગિક વિકાસ ઘટયોઃ મોંઘવારી વધી

જુલાઇમાં IIP વૃધ્‍ધિ ઘટીને ૧.૨ ટકાઃ મેન્‍યુફેકચરીંગ ઠપ્‍પ : ગયા વર્ષે વૃધ્‍ધિદર ૪.૫ ટકા હતોઃ ઓગષ્‍ટમાં રિટેલ ફુગાવો વધીને ૩.૩૬ ટકા

   નવી દિલ્‍હી તા. ૧૩ : મેન્‍યુફેક્‍ચરિંગ ક્ષેત્રની ખાસ કરીને કેપિટલ ગૂડ્‍ઝ ક્ષેત્રની નબળી કામગીરીને લીધે જુલાઈમાં ઔદ્યોગિક ઉત્‍પાદન આંક(IIP)માં ૧.૨ ટકાની આંશિક વૃદ્ધિ જોવાઈ હતી. પાછલા વર્ષે આ સમયગાળા દરમિયાન ઔદ્યોગિક ઉત્‍પાદન આંકમાં ૪.૫ ટકાની વૃદ્ધિ નોંધાઈ હતી. આઈઆઈપીના નબળાં દેખાવને પગલે રિઝર્વ બેન્‍ક પર વ્‍યાજ દરમાં ઘટાડો કરવાનું દબાણ વધ્‍યું છે.સેન્‍ટ્રલ સ્‍ટેટેસ્‍ટિક્‍સ ઓફિસ (CSO) દ્વારા જારી કરાયેલા સુધારેલા અંદાજ મુજબ જૂનના ૦.૨ ટકાની તુલનાએ જુલાઈમાં આઈઆઈપીમાં સુધારો નોંધાયો હતો.પાછલા વર્ષના સમાન સમયગાળાના ૬.૫ ટકાની તુલનાએ ચાલુ વર્ષે એપ્રિલ-જુલાઈ દરમિયાન IIP ઘટીને ૧.૭ ટકા રહ્યો હતો. ઔઘોગિક ઉત્‍પાદન આંકમાં આશરે ૭૭.૬ ટકા જેટલો ભારાંક ધરાવતા મેન્‍યુફેક્‍ચરિંગ ક્ષેત્રની વૃદ્ધિ ૨૦૧૬ના સમાન સમયગાળાના ૫.૩ ટકાની તુલનાએ નોંધપાત્ર ધોરણે ઘટીને જુલાઈમાં ૦.૧ ટકા રહેવા પામી હતી. કેપિટલ ગૂડ્‍ઝ ક્ષેત્રની વૃદ્ધિ વર્ષ અગાઉના ૮.૮ ટકાની તુલનાએ ચાલુ વર્ષે જુલાઈમાં ઘટીને ૧ ટકાના સ્‍તરે જોવાઈ હતી. વર્ષ અગાઉ ૦.૨ ટકાની આંશિક વૃદ્ધિ દર્શાવનાર કન્‍ઝ્‍યૂમર ડ્‍યુરેબલ ગૂડ્‍ઝ ક્ષેત્રે ઉત્‍પાદનમાં ૧.૩ ટકાનો ઘટાડો જોવાયો હતો. જોકે સમીક્ષાના સમયગાળા દરમિયાન વીજ ઉત્‍પાદન ક્ષેત્રે ૬.૫ ટકાની વૃદ્ધિ નોંધાઈ હતી. ગત વર્ષે સમાન સમયગાળામાં વીજ ઉત્‍પાદન ક્ષેત્રે ૨.૧ ટકાની વૃદ્ધિ જોવાઈ હતી. માઈનિંગ ક્ષેત્રે પણ જુલાઈમાં કામગીરીમાં ૪.૮ ટકાની વૃદ્ધિ જોવાઈ હતી. જુલાઈ, ૨૦૧૬માં માઈનિંગ ક્ષેત્રએ ૦.૯ ટકાની આંશિક વૃદ્ધિ નોંધાવી હતી.

   સમીક્ષાના સમયગાળા દરમિયાન પ્રાઈમરી ગુડ્‍ઝ ક્ષેત્રે ગત વર્ષની તુલનાએ ૨.૩ ટકાની, ઈન્‍ટરમીડિયેટ ગુડ્‍ઝ ક્ષેત્રે (-)૧.૮ ટકા તથા ઈન્‍ફ્રાસ્‍ટ્રક્‍ચર અને કન્‍સ્‍ટ્રક્‍શન ગુડ્‍ઝ ક્ષેત્રે ૩.૭ ટકાની વૃદ્ધિ જોવાઈ હતી. જયારે કન્‍ઝ્‍યૂમર નોન-ડ્‍યુરેબલ ગુડ્‍ઝ ક્ષેત્રે ૩.૪ ટકાની વૃદ્ધિ દર્શાવી હતી. ગત વર્ષના સમાન મહિનાની તુલનાએ જુલાઈ, ૨૦૧૭માં મેન્‍યુફેક્‍ચરિંગ સેક્‍ટરના ૨૩ ઔદ્યોગિક જૂથમાંથી ૮માં વૃદ્ધિ જોવાઈ હતી.

   શાકભાજી તથા ફળો જેવા ખાદ્યપદાર્થોની કિંમતમાં થયેલાં વધારાને પગલે ઓગસ્‍ટમાં છૂટક ફુગાવો ૩.૩૬ ટકાની પાંચ મહિનાની ટોચે સ્‍પર્શ્‍યો હતો. છૂટક ફુગાવો જુલાઈમાં ૨.૩૬ ટકાના સ્‍તરે રહેવા પામ્‍યો હતો. ઓગસ્‍ટનો ફુગાવાનો આંક માર્ચ, ૨૦૧૭ના ૩.૮૯ ટકા પછીના સૌથી ઊંચા સ્‍તરે છે. એકંદર ખાઘાન્ન ફુગાવો ઓગસ્‍ટમાં ૧.૫૨ ટકા રહેવા પામ્‍યો હતો.

   ફુગાવામાં થયેલા વધારા તથા નબળી આર્થિક વૃદ્ધિને પગલે આવતા મહિને યોજાનારી રિઝર્વ બેન્‍કની નાણાકીય નીતિની સમીક્ષામાં ચાવીરૂપ વ્‍યાજ દરમાં ઘટાડો થવાની શક્‍યતા ધૂંધળી બની છે. ઓગસ્‍ટમાં કન્‍ઝ્‍યૂમર પ્રાઈસ ઈન્‍ડેક્‍સ(સીપીઆઈ) વર્ષ અગાઉની તુલનાએ વધીને ૩.૩૬ ટકા નોંધાયો હોવાનું મિનિસ્‍ટ્રી ઓફ સ્‍ટેટેસ્‍ટિક્‍સના આંકડામાં દર્શાવાયુ છે. ફળોના ભાવમાં ૫.૨૯ ટકા તથા શાકભાજીના ભાવમાં ૬.૧૬ ટકાનો વધારો જોવાયો હતો. ગત મહિને સમાન સમયગાળા દરમિયાન ફળોના ભાવનો ફુગાવો ૨.૮૩ ટકા જયારે શાકભાજીના ભાવનો ફુગાવો (-)૩.૫૭ ટકા રેહવા પામ્‍યો હતો. તૈયાર ભોજન, નાસ્‍તા તથા મીઠાઈના ભાવમાં જુલાઈના ૦.૪૩ ટકાની તુલનાએ ઓગસ્‍ટમાં ૧.૯૬ ટકાનો વધારો જોવાયો હતો.

 (11:23 am IST)
 

Share This News

Facebook
Twitter
Blogger
 

Follow Akilanews.com

Facebook
Twitter
YouTube
RSS
 
 

આપની ઓનલાઈન ખરીદી માટે અહીં ક્લિક કરો