vividh-vibhag

News of Wednesday, 31st December, 2014

પૃથ્‍વી પરનું સ્‍વર્ગ ન્‍યુઝીલેન્‍ડ

ચારે બાજુ હરીયાળી અને પર્વત ઉપર બરફ છવાયેલો હોય, નદીઓ અને તળાવો ભરાયેલા હોય તેવું રમણિય અને આહ્‌લાદક સૌદર્ય ધરાવતું વાતાવરણ : ખુશ્‍નુમા અને તાજગીસભર માહોલમાં માંદો માણસ એમને એમ સાજો થઇ જાય ! : નિરવ શાંતિ અને પ્રવાસીઓનું અદ્દભુત આકર્ષણ ધરાવતો મનમોહક અને સોહામણો દેશ !! : કુદરતે ખોબલે-ખોબલે અને ભરી ભરીને આ દેશને સૌંદર્ય બક્ષ્યું છે : ભારતીયો માટે પણ ફરવા જવાનું ‘હોટ પ્‍લેસ' બનતું જાય છે: વિવિધ સ્‍પોર્ટસ ઇવેન્‍ટસ, રાઇડઝ અને વોટર રાઇડઝનો અુનભવ પણ કંઇક અલગ જ છે: આંખ અને તન-મનને ઠંડક પહોંચાડતો અને સુહાની સફર કરાવતો દેશ ન્‍યુઝીલેન્‍ડ હકીકતે ફરવા લાયક છે: લેસ કરપ્‍શન, નહિવત ક્રાઇમ રેટ, પર્યાવરણની રક્ષા અને ચોખ્‍ખાઇ, દેશની વિશેષતા!

પૃથ્‍વી પરનું સ્‍વર્ગ ન્‍યુઝીલેન્‍ડ

      સમગ્ર વિશ્વના દેશોના લોકો છેલ્લા દશેક વર્ષથી જે દેશને પૃથ્‍વી પરનું સ્‍વર્ગ કહી રહ્યા છે તથા અગ્રગણ્‍ય વૈશ્વિક સંસ્‍થાઓએ તમામ દૃષ્‍ટિકોણને ધ્‍યાનમાં રાખીને જે દેશને ‘‘બેસ્‍ટ કન્‍ટ્રી''નું બિરૂદ આપ્‍યું છે તેવો સપનાનો દેશ ન્‍યુઝીલેન્‍ડ હકીકતે ધાર્યા અને સાંભળ્‍યા કરતા પણ ઘણો જ વધારે મનમોહક અને રમણિય છે, જેમાં બે મત નથી નથી ને નથી જ.

      અહીં તન-મનને પ્રફુલ્લિત કરી દે તેવી હરીયાળી અને પર્વતો તથા રસ્‍તા ઉપર ચારે બાજુ બરફ જોવા મળે છે. એકદમ તાજગી ભર્યું તંદુરસ્‍ત વાતાવરણ અને નિરવ શાંતી જોવા મળે છે. હમણાં છેલ્લા ત્રણેક વર્ષોથી ભારતીયો માટે પણ ન્‍યુઝીલેન્‍ડ આકર્ષણનું કેન્‍દ્ર બની ગયો છે.

      પૃથ્‍વીનો ગોળો જોઇએ તો તેમાં દુનિયામાં સાવ છેવાડે એન્‍ટાર્કટીકા ખંડમાં આવેલો ન્‍યુઝીલેન્‍ડ દેશ વસ્‍તીના પ્રમાણમાં ઘણો મોટો જમીન વિસ્‍તાર ધરાવે છે. આખા દેશની કુલ વસ્‍તી માત્ર ૪૪ લાખ જેટલી છે. વસ્‍તીમાં મોટે ભાગે ગોરા લોકો જ જોવા મળે છે. યુરોપમાંથી કે ચીનથી આવેલા લોકો પણ જોવા મળતા હોય છે. સમગ્ર વિશ્વમાં સ્‍વિકૃત ઇંગ્‍લિશ ભાષા જ ત્‍યાં બોલાય છે.

      અહીંના લોકો એકદમ શાંતિપ્રિય તથા કાયદામાં અને શિસ્‍તમાં માનનારા છે. ન્‍યુઝીલેન્‍ડમાં કાયદા સખત હોવાને કારણે લોકો ગુનો કરતા જ ડરે છે તથા ગુનેગારોને કડકમાં કડક સજા આપવાની પણ હિમાયત કરે છે. આ દેશનો ક્રાઇમ રેટ સાવ નહિવત છે. અહીં ચોરી થવાની શકયતા સાવ નહીવત છે. દુકાનોને લોખંડના શટર હોતા જ નથી, માત્ર કાચ જ જોવા મળે છે. લોકો રાત્રે સુતી વખતે પણ પોતાના ઘરમાં લોક કરવાનું જરૂર નથી સમજતા. ટૂંકમાં ઇમાનદારી અને અપવાદ બાદ કરતા ગુનાઓનું નહીંવત પ્રમાણએ આ દેશની વિશેષતા છે.

      રાત્રે રોડ ઉપર સતત પોલીસ પેટ્રોલીંગ જોવા મળે છે. જો કે પોલીસનું કામ અહીં સાવ ઓછું છે. છતાં પણ લોકોની સલામતીને પ્રથમ પ્રાધાન્‍ય અપાતું જોવા મળે છે. અહીંના મોટાભાગના લોકો શનિ-રવિ રજા રાખવાનું પસંદ કરતા હોય છે. ઉપરાંત અહી મોટાભાગના વેપારીઓ પણ સાંજે પ વાગ્‍યા સુધી જ પોતાના સ્‍ટોર્સ ખૂલ્લા રાખે છે. સાંજે છ વાગ્‍યાથી યુવક-યુવતીઓ, પ્રૌઢો તથા વૃધ્‍ધો પણ વિવિધ હોટલમાં, કલબ, પબ વિગેરેમાં ‘‘પાર્ટીકલ્‍ચર'' માં મહાલતા જોઇ શકાય છે.

      ન્‍યુઝીલેન્‍ડનું વાતાવરણ એટલું ખુશ્‍નુમાં છે કે ત્‍યાં માંદો માણસ પણ દવા વગર જ સાજો થઇ જાય. અથવા તો માણસો અહીં માંદા જ ઓછા પડે છે. હયાતીના સમયે બ્રિટનના રાણી વિકટોરીયાનું પ્રિય સ્‍થળ એવુ હાલના કિવન્‍સ ટાઉન શહેરમાં તો એકપણ મોટી હોસ્‍પિટલ કે મોટા ડોકટર જ નથી, જે ચોકકસપણે આヘર્ય પમાડે તેવી વાત છે. જો આ શહેરમાં કોઇને એટેક સહિતની કોઇ ગંભીર બિમારી થાય તો તેને હેલીકોપ્‍ટરમાં તાબડતોબ અન્‍ય શહેરમાં લઇ જવા પડતા હોવાનું સંભળાતું હતું.

      દૂનિયાના સ્‍વર્ગની સાથે-સાથે ન્‍યુઝીલેન્‍ડ છેલ્લા થોડાક વર્ષોથી પ્રવાસીઓ માટેનું સ્‍વર્ગ પણ ગણાઇ રહ્યું છે. સમગ્ર વિશ્વમાંથી પ્રવાસીઓ અહી આવે છે અને મધમીઠી યાદો લઇને પોતાના દેશમાં જાય છે. જો કે ન્‍યુઝીલેન્‍ડની સરકાર પોતાના દેશમાં એન્‍ટ્રી આપવા બાબતે થોડીક સ્‍ટ્રીકટ છે. કારણ કે દેશના પર્યાવરણનું રક્ષણ એ તેમની પ્રાયોરીટી છે. પર્યાવરણને નુકશાન થાય કે પછી ત્‍યાંની વનસ્‍પતીને નુકશાન થાય અને પ્રદુષણ વધે તેવી કોઇપણ વસ્‍તુ  એરપોર્ટ ઓફીસર દેશમાં લઇ નથી જવા દેતા. અરે, આપણે લોકો આપણી સાથે શુઝ સ્‍લીપર ચપ્‍પલ, ફલોટર્સ વિગેરે લઇ ગયા હોય તો તે ધુળવાળા ન હોય તેની પણ તેઓ ખાતરી કરતા જોવા મળે છે.

      ફુડ પેકેટસ કે પછી ફુડ આઇટમ તથા જોઇતી દવાઓ આપણે સાથે લઇ ગયા હોય તો તે ફરજિયાત કસ્‍ટમ ડીકલેરેશન ફોર્મમાં લખવી પડે છે. જો ન લખીએ અને ચેક કરતાં પકડાઇ જઇએ તો આકરોદંડ ભરવાની તૈયારી રાખવી પડેછે. લટકામાં જે -તે વસ્‍તુ તો જપ્ત કરી લેવામાં જ આવે છે.

      કોઇપણ જાતના ડ્રાયફુટસ, નટસ, સીડઝ,ઘી, માખણ, આયુર્વેદિક દવાઓ, ખારીસીંગ વિગેરે તો લઇ જવાની સદંતર મનાઇ જ છે. આના પરથી એવું ફલિત થાય કે ન્‍યુઝીલેન્‍ડ દેશની વિશાળ કુદરતી સંપતિ જેટલી છે તે દેશ માટે પૂરતી છે. તેઓ કોઇપણ જાતની નવી વસ્‍તુ વધારવા માંગતા નથી. ન્‍યુઝીલેન્‍ડમાં જ પુષ્‍કળ પ્રમાણમાં  વિવિધ પ્રકારની અસરકારક આયુર્વેદિક દવાઓ બને છે જે સમગ્ર વિશ્વના લોકો ઉમળકાભેર ત્‍યાંથી લઇ જાય છે. ઘણી બધી દવાઓની તો વૈશ્વિક પેટન્‍ટ પણ કરાવી હોવાનું દેખાય છે. ગ્રીનરી, ખેતરો, જંગલ વિસ્‍તાર, પર્વતીય વિસ્‍તાર હોવા છતાં પણ ત્‍યાં એકપણ પ્રકારના સાપ (નાગ) ન હોવાનું ત્‍યાંના લોકલ ગાઇડનું કહેવું હતું.

      આપણા ભારતના બોલીવુડ સહિત વિશ્વના હોલીવુડ અને બીજી બધી ફિલ્‍મ ઇન્‍ડસ્‍ટ્રીઝ માટે શુટીંગ કરવાનું આગવું સ્‍થાન ધરાવતો દેશ ન્‍યુઝીલેન્‍ડને કહી શકાય. ભારતના બોલીવુડના રાકેશ રોશન દિગ્‍દર્શીત અને ઋિતીક રોશન તથા અમિષા પટેલ અભિનિત સુપરહીટ ફિલ્‍મ ‘કહોના પ્‍યાર હે' નું ઘણું ખરૂ શુટીંગ ન્‍યુઝીલેન્‍ડમાં થયું છે.

      ન્‍યુઝીલેન્‍ડની ખેતી મોટે ભાગે આપણા ભારત દેશ જેવી જ છે. તથા ત્‍યાંની ગાય અને દુધાળા પ્રાણીઓ પણ ભારતના પ્રાણીઓને મળતા આવે છે.

      દુધની બનાવટો જેવી કે આઇસ્‍ક્રીમ, મિલ્‍ક શેઇક, ચોકલેટ, જુદી જુદી ફલેવર વાળા મિલ્‍ક, દહીં, યોગાર્ટ વિગેરે માટે ન્‍યુઝીલેન્‍ડ પ્રખ્‍યાત છે. જો કે આપણા ભારત દેશની પેરીટીમાં ઉપરોકત બનાવટો આપણા રૂપિયા પ્રમાણે આપણને મોંઘી પડે છે. પરંતુ કવોલિટી વાઇઝ જોઇએ તો તે શ્રેષ્‍ઠ છે.

      ન્‍યુઝીલેન્‍ડનું ચલણ ન્‍યુઝીલેન્‍ડ ડોલર છે. એક ડોલર બરાબર આપણા પચાસ રૂપિયા આસપાસ થાય છે. આ જોતા ત્‍યાંથી શોપીંગ કરવાની શકયતા નહીંવત થઇ જાય છે. આપણા રૂપિયામાં ગણત્રી કરતા ત્‍યાં મળતી વસ્‍તુ આપણા ભારતની સરખામણીમાં ઘણી જ મોંઘી પડતી હોય છે. ત્‍યાં નાની એવી ટોપી લઇએ તો તે આપણને ૩૦ થી ૩પ ડોલરની પડતી હોય છે. અથવા તો ત્‍યાંથી બરમુડા (શોર્ટસ) લઇએ તો તે પ૦ ડોલર આસપાસ પડતો હોય છે, જેના આપણાં ભારતીય રૂપિયા રપ૦૦ જેટલા થાય.

      ન્‍યુઝીલેન્‍ડમાં લાકડાનો ઉપયોગ પુષ્‍કળ પ્રમાણમાં થાય છે. ત્‍યાં લાકડુ પણ ખુબજ મળે છે. ત્‍યાં સિમેન્‍ટનો ઉપયોગ ઘણો જ મર્યાદિત જોવા મળે છે. ત્‍યાં હિમવર્ષા, ઠંડી, વરસાદ તથા ઘણી જગ્‍યાએ ભૂકંપની શકયતાને કારણે મકાનો ઉપરના ભાગેથી સ્‍લોપ (ઢાળ) વાળા જોવા મળે છે. દેશમાં ઘણો ભાગ તો સક્રિય જવાળા મુખી ને કારણે પણ અસ્‍તિત્‍વમાં આવેલો છે.

       પ્રવાસીઓને ન્‍યુઝીલેન્‍ડમાં મની એક્ષચેન્‍જની તકલીફ ન પડે તે માટે દરેક સીટીમાં, એરપોર્ટ ઉપર, મેઇન રોડ અને બજાર ઉપર, પબ્‍લિક પ્‍લેસ ઉપર તથા મોટા ડીપાર્ટમેન્‍ટલ સ્‍ટોર્સમાં મની ચેન્‍જરની પુરતી ફેસિલિટી પૂરી પાડવામાં આવે છે.

      ન્‍યુઝીલેન્‍ડમાં ટ્રાફીક સેન્‍સ અને ટ્રાફીક રૂલ્‍સ-ડીસીપ્‍લીન પણ ગજબના છે.ટ્રાફીક હોય કે ન હોય ર૪ કલાકમાં દરેક વખતે સિગ્નલ સહિતના ટ્રાફીકના નિયમોનું પાલન ચુસ્‍તપણે કરવું પડે છે.ટ્રાફીક સિગ્નલ તોડનાર વાહન ઓટોમેટીકલી સેન્‍સરમાં (કેમેરામાં) આવી જાય છે અને વાહન ચાલક ઉપર સખ્‍ત પગલાં લેવામાં આવે છે. ત્‍યાં રસ્‍તા ઉપર ઢોરને ચાલવાની સખત મનાઇ છે.

      અહીંના નાના-મોટા દરેક રસ્‍તાઓ નીટ એન્‍ડ કલીન જોવા મળે છે. આ દેશમાં ઠંડીને કારણે ગાડીઓ પણ પુષ્‍કળ પ્રમાણમાં જોવા મળે છે. અહીં વિશ્વની પ્રસિધ્‍ધ ગાડીઓ જેવી કે બી એમ ડબલ્‍યુ, ઓડી, જગુઆર, મર્સીડીસ વિગેરે સેકન્‍ડ હેન્‍ડ માર્કેટમાં ઘણીજ ઓછી કિંમતે વેચાતી હોવાનું ત્‍યાંના ગાઇડનું અને ટૂર ઓપરેટરનું કહેવું હતું. એક-એક ઘરદીઠ પૂરતા પાર્કિંગ સાથે ત્રણ-ત્રણ ચાર-ચાર ગાડીઓ પણ જોવા મળતી હતી.

      ન્‍યુઝીલેન્‍ડમાં ખૂબ જ ઉત્‍કૃષ્‍ટ રીતે પર્યાવરણની જાળવણી કરવામાં આવે છે. જો કોઇ વાહન કે બીજી કોઇપણ રીતે વ્‍યકિત પર્યાવરણને નુકશાન પહોંચાડે તો તેની ઉપર કાયદેસરના કડક પગલાં લેવાય છે. અહીં ટુ વ્‍હીલર (બાઇક) કે કાર લેવા માટે પણ પ્રથમ મંજુરી લેવાતી હોય છે. ન્‍યુઝીલેન્‍ડમાં  કરપ્‍શન (ભ્રષ્‍ટાચાર) ખૂબ જ ઓછું  છે. સમગ્ર વિશ્વમાં ‘લેસ કરપ્‍શન'માં ન્‍યુઝીલેન્‍ડનું સ્‍થાન બીજું હોવાનું સંભળાતું હતું.

      ન્‍યુઝીલેન્‍ડમાં રાત્રે દસ સુધી અજવાળુ હોય છે. ત્‍યાં રાત્રે નવ વાગ્‍યા સુધીતો સૂરજદાદા દેખાતા હોય છે. ત્‍યાં રાત પ્રમાણમાં ટૂંકી હોય છે. આપણા ભારત કરતા ત્‍યાંનો સમય સાડાસાત કલાક આગળ છે.

      ન્‍યુઝીલેન્‍ડમાં વિવિધ સ્‍પોર્ટસ ઇવેન્‍ટસ અને રાઇડઝ પણ અનોખું અને અસામાન્‍ય આકર્ષણનું કેન્‍દ્ર છે. જેમાં સ્‍કાય વોક, સ્‍કાય ડાઇવિંગ, બન્‍જીજંપીંગ, પેરેસેઇલિંગ, પેરાગ્‍લાઇડીંગ, વર્લ્‍ડ ફેમસ અને વર્લ્‍ડ રેકોર્ડ બનાવનાર શોટઓવર જેટ બોટ વોટર રાઇડીંગ, કેબલ કાર, રોપ-વે, રોલર કેબલ, ગ્‍લેશીયર્સ વ્‍યુ વિથ હેલીકોપ્‍ટર વિગેરેનો સમાવેશ થાય છે. આ રાઇડઝનો અનુભવ અનફર્ગેટેબલ, એકસાઇટીંગ અને અમેઝીંગ હોય છે.

      ન્‍યુઝીલેન્‍ડમાં લગભગ દરેક સીટીમાં ઇન્‍ડિયન રેસ્‍ટોરન્‍ટસ આવેલા છે જેમાં સ્‍વાદૃષ્‍ટિ ફુડ મળી રહે છે.

      ન્‍યુઝીલેન્‍ડ જવા માટે સૌપ્રથમ મુંબઇ ઇન્‍ટરનેશનલ એરપોર્ટ પરથી ઓકલેન્‍ડની (વાયા સીંગાપુર) ‘સિંગાપુર એરલાઇન્‍સ''ની ફલાઇટ પકડી શકાય છે. જો કે ન્‍યુઝીલેન્‍ડ જવા માટે અન્‍ય એરલાઇન્‍સ પણ પોતાની સેવાઓ આપે છે. ઘણી એરલાઇન્‍સ સીધી ન્‍યુઝીલેન્‍ડના પાટનગર વિલિંગ્‍ટન પણ લઇ જાય છે. મુંબઇથી સિંગાપુર સાડાપાંચ કલાક અને સિંગાપુરથી  ઓકલેન્‍ડ પહોંચવામાં ૧૧ થી ૧ર કલાક જેટલો સમય લાગે છે. ન્‍યુઝીલેન્‍ડના દરેક સ્‍થળ-શહેર ફોટોગ્રાફી અને શુટીંગ માટે ઉત્તમ હોય છે. કુદરતે ભરીભરીને ‘નેચરલ બ્‍યુટી' આપી છે. (પાણી સરોવર, દરીયો, પર્વતો, બરફ, જંગલો, વૃક્ષો, ખેતરો, નદી, ગ્‍લેશીયર્સ, મેદાનો વિગેરે બધું એક જ દેશમાં!!) . અમેરિકા-યુરોપ સહીતના દેશોના વૈજ્ઞાનીકો પર્વતો, બરફ, મેદાનો વિગેરેની નીચે શું છે તે વિષે સતત સંશોધન કરતા હોવાનું સંભળાય છે.

      ઓકલેન્‍ડ અને વાઇટોમો કેવ્‍ઝ

      ન્‍યુઝીલેન્‍ડનું  સતત કાર્યશીલ અને ધમધમતુ સિટી ઓકલેન્‍ડ ખરેખર જોવા લાયક છે. ખાસ કરીને ત્‍યાંનું ‘સ્‍કાયસિટી' ઓકલેન્‍ડ સ્‍કાય ટાવર સાઉથર્ન હેમોસ્‍ફીયરનું સૌથી ઉચું સ્‍કાય ટાવર છે. (૩ર૮ મીટર) આ વર્ટીકલ રાઇડરૂપ ટાવરમાં સ્‍કાયવોકનો અદ્દભૂત આનંદ માણી શકાય છે. આ ઉપરાંત હાર્બર બ્રીજ, મિશન બ,ે બેસન પોઇન્‍ટ, તમાકી ડ્રાઇવ, પાર્નેલ વિલેજ, કિવન સ્‍ટ્રીટ વિગેરે જગ્‍યાએ ફરવાની અનેરી મજા લઇ શકાય છે.

      ઓકલેન્‍ડથી કોચમાં ત્રણેક કલાકના અંતરે વાઇટોમો ગ્‍લોવોર્મ કેવ્‍ઝ (ગૂફા) નો અદ્દભૂત અને અલૌક્કિ આનંદ લઇ શકાય છે. જેમાં ૩૦ મિલિયન વર્ષો પહેલાના સમુદ્રના પેટાળમાં આવેલ લાઇમ સ્‍ટોન અને વર્ષોથી તેની ઉપર રહેલા શાઇનિંગ ઇન્‍સેકટસ ખૂબજ શાંતિ રાખીને બોટમાં બેસીને જોવા જેવા છે. જાણે કે આખું તારામંડળ આપણી નજીક છે તેવો અવિસ્‍મરણીય અનુભવ થાય છે.

      ઓકલેન્‍ડથી ક્રાઇસ્‍ટચર્ચ

      ક્રાઇસ્‍ટચર્ચ એ ન્‍યુઝી લેન્‍ડનું મસ્‍ત મજાનું સિટી છે. અહી બ્રિટીશર્સ ઘણા  બધાં છે. જો કે  ફેબ્રુઆરી-ર૦૧૧માં ભયાનક ભૂકંપ આવતા હજુ ઘણા કન્‍સ્‍ટ્રકશન્‍સ ચાલુ છે. અહીં જમીન-મકાનના ભાવ પણ ઘણાં ઉંચા છે. ક્રાઇસ્‍ટચર્ચમાં સિટીટુરમાં કેન્‍ટરબેરીની વિશાળ યુનિવર્સિટી, રીકાર્ટન હાઉસ, હોગલે પોર્ક, મ્‍યુઝિયમ, બોટનિકલ ગાર્ડન વિગેરે છે.

      અહીં એન્‍ટાર્કટીક ફીલ્‍ડ કેમ્‍પના ‘ધ સ્‍નો એન્‍ડ આઇસ એકસપીરીયન્‍સ' માં બરફ અને બરફના તોફાનના અનુભવમાં માઇનસ ૧૮ ડીગ્રી તાપમાનમાં રહેવાનો સુંપર્ર્બ ચાન્‍સ મળે છે. ઉપરાંત પર્વત, પાણી અને જમીનની નીચે એમ ત્રણેય જગ્‍યાએ ચાલતી રાઇડનો અદ્દભુત આનંદ લઇ શકાય છે.

      ક્રાઇસ્‍ટચર્ચ થી ગ્રેમાઉથ ગ્‍લેશીયર રીજીયન

      આર્થર્સ પાસ નામનો આ રસ્‍તો સોફીસ્‍ટીકેટેડ પર્વતોનો જોવા લાયક, માણવાલાયક અને યાદગાર રસ્‍તો છે. આખા વિસ્‍તારની સીનસીનરી, બ્‍યુટી અને કુદરતી સૌંદર્ય સમગ્ર ન્‍યુઝીલેન્‍ડમાં શ્રેષ્‍ઠ છે. ફોટોગ્રાફી અને શુટીંગ માટેબેનમૂન છે. નદી, તળાવ, પર્વતો, જંગલોથી ભરપૂર આ આખો રૂટ હકીકતે ફેન્‍ટાસ્‍ટીક છે. સાઉથર્ન આલ્‍પ્‍સ પર્વતમાળામાં સૌથી ઉત્તમ સીનસીનરી અને આહ્‌લાદક સૌંદર્ય અહીં જોવા મળે છે.

      વચ્‍ચે હોકીટીકા શહેરમાં સ્‍વાદૃિષ્‍ટ ઇન્‍ડિયન લંચ લઇને ફ્રાન્‍સ જોસેફ ગ્‍લેશીયર રીજીયન તરફ જઇ શકાય છે જયાં નદી, પર્વતો, મેદાન, રેતી, હિમવર્ષા, વાદળો, વરસાદ વિગેરે જેવી વાતાવરણની જુદી જુદી પેટર્નનો ભરપૂર કુદરતી આનંદ લઇ શકાય છે. આ ગ્‍લેશીયર્સ કન્‍ટ્રીલનો વેસ્‍ટલેન્‍ડ નેશનલ પાર્કના વર્લ્‍ડ હેરીટેજ એરીયામાં સમાવેશ કરવામાં આવ્‍યો છે.

      ફ્રાન્‍સ જોસેફ ગ્‍લેશીયરથી વાનાકા અને કિવન્‍સ ટાઉન

      ફ્રાન્‍સ જોસેફ ગ્‍લેશીયરથી વાનાકાનો રસ્‍તો કોચમાં ચારેક કલાક જેટલો છે. જેમાં કુદરતી સૌંદર્યનો તથા ન્‍યુઝીલેન્‍ડના બેસ્‍ટ ઓલસીઝન રીસોર્ટસનો મનભરીને આનંદ લૂંટી શકાય છે. ટાવરીંગ માઉન્‍ટ એસ્‍પીરીંગ સાથેના પર્વતો, જંગલો,વેલીઓ અને ચોખ્‍ખા પાણીના તળાવો, સોનામાં સુગંધ ભેળવતા હોવાનું દેખાય છે

      વાનાકા ખાતે વર્લ્‍ડ ફેમસ ‘પઝલીંગ વર્લ્‍ડ' આવેલુંછે જે સાત એકરની વિશાળ લોનમાં બનેલું  છ.ે જેમાં ભૂલભૂલામણી સહિત આヘર્ય ચકિત કરી દે તેવી વિવિધ પઝલ્‍સ અન ેમગજને ફ્રેશ કરનારી ગેઇમ્‍સ છે. દુનિયાનું સૌપ્રથમ ‘મોડેમ સ્‍ટાઇલ' પઝલ સેન્‍ટર છે. આર્કીટેકચરનો અદ્દભૂત નમુનો છે. અહીથી કિવન્‍સ ટાઉન દોઢથી બે કલાક જેટલો સમય થાય છે. વચ્‍ચે બ્‍લ્‍યુ અને ગ્રીન બંને કલરના પાણીવાળી કાવારોવ નામની ખૂબ સરસ નદી જોવાનો લ્‍હાવો ચુકવા જેવો નથી. કિવન્‍સ ટાઉન જવા માટે આ કોરીડોર ખરેખર જોવાલાયક અને માણવાલાયક છે.

      બ્રિટનના રાણી વિકટોરીયાનું પ્રિય સ્‍થળ એવું કિવન્‍સ ટાઉન દુનિયાના અને ન્‍યુઝીલેન્‍ડના સાવ છેડે આવેલું છે અહી ઠંડી પણ પ્રમાણમાં વધુ પડે છે. અહીં જુદી જુદી સ્‍પોટર્સ ઇવેન્‍ટસ પણ કરી શકાય છે.

      અહીંથી સ્‍કાયલાઇન વર્ટીકલ કેબલ કાર લઇને ઉપર કોરોનેટ પીકનો રમણિય અને આહૃલાદક નઝારો જોઇ શકાય છે, જે ખરા અર્થમાં સ્‍વર્ગીય આનંદ કહી શકાય. આટલી ઉંચાઇ ઉપર વિવિધ જાતની કેક, પેસ્‍ટ્રીઝ અને આઇસ્‍ક્રીમ સાથે આલાગ્રાન્‍ડ વેજીટેરીયન અને નોન વેજીટેરીયન ફુડનો મેગ્નીફીસન્‍ટ આનંદ માણી શકાય છે. ખરેખર બે સેકન્‍ડ માટે શ્વાસ થંભી જાય તેવો ફેબ્‍યુલસ વ્‍યુ અહીંથી જોઇ શકાય છે. સાથે-સાથે આટલી ઉંચાઇ ઉપર સાઇકલીંગ, બેબી સ્‍કુટર તથા ટોય કાર રાઇડીંગ, રોપ-વે વિગેરેનો અલૌકિક આનંદ લઇ શકાય છે.

      કિવન્‍સટાઉનથી ડુનેડિન થઇને બાયએર ઓકલેન્‍ડ રીટર્ન આવી શકાય છે ત્‍યાંથી સિંગાપુરની ફલાઇટ પકડી શકાય છે.

      સિંગાપુર

      સિંગાપુર પણ મનમોહક દેશ છે. રીટર્નમાં સિંગાપુરમાં ૧૦ કલાક જેવો સમય હોય તો ચોક્કસપણે ત્‍યાંની સિટી ટુર કરી શકાય છે. ત્‍યાંનુ સિંગાપુર ફલાયર તથા સેન્‍ટોસા આયલેન્‍ડ વર્લ્‍ડ ફેમસ છે. સિંગાપુરના આકર્ષણરૂપ ચાંગી ઇન્‍ટરનેશનલ એરપોર્ટ પરથી મુંબઇની ફલાઇટ લઇ ઇન્‍ડિયા આવી શકાય છે.

      આમ, સાચા અર્થમાં ન્‍યુઝીલેન્‍ડ મનમોહક, આહૃલાદક,રમણીય અને સોહામણો દેશ છે, કે જયાં માણસ કુદરતી સૌંદર્યમાં તરબોળ બની જાય છે અને સ્‍વર્ગમાં હોવાની અનુભૂતિ અનુભવતો હોવાનું દેખાય છે. છતાં પણ એક વાત દૃઢતાપૂર્વક કહી શકાય કે ભારતનો નાગરીક દુનિયામાં ગમે તે જગ્‍યાએ જાય, હરે-ફરે, મોજ, મજા કરે, એજયુકેશન મેળવે, બિઝનેસ કે સર્વિસ કરે., સમાજસેવા કરે, પરંતુ તેના મનમાં ને મનમાં એકવાત સતત આવતી જ રહેતી હશે કે ઇન્‍ડિયા ઇ ઇન્‍ડિયા જ છે. તેનો જોટો જડે તેમ નથી. ‘‘મેરા ભારત મહાન'', ભારત માતા કી જય. ભારતનાં લોકલાડીલા અને દીર્ઘદ્રષ્‍ટા વડાપ્રધાન નરેન્‍દ્રભાઇ મોદીનાં મેક ઇન ઇન્‍ડીયા તથા સ્‍વચ્‍છ ભારત કેમ્‍પેઇનને પણ સો સો સલામ.

      મારી અને મારી પત્‍ની જુલીની આ યાદગાર ટુર માટે ઇશ્વરે જેને નિમિત બનાવ્‍યા છે તેવા પૂ. ગોવિંદભાઇ દેવાણી તથા પૂ. શારદાબેન દેવાણી-કેશોદ (માસા-માસી) તથા પૂ. દિનુભાઇ દેવાણી તથા પૂ. ડો. રમાબેન દેવાણી -કેશોદ (પપ્‍પા-મમ્‍મી) ના ચરણોમાં વંદન કરૂ છું. સાથે -સાથે મારા બંને બાળકો ફોરમ અને આર્યનનો પણ અમને મોકલવામાં અમૂલ્‍ય ફાળો છે.

       અંતમાં મારા ન્‍યુઝીલેન્‍ડના પ્રવાસના સ્‍વ અનુભવોનું રસપ્રદ આલેખન આબેહૂબ રીતે હું આપના સુધી પહોંચાડી શકયો તે બદલ અકિલાનાં મોભી, મારા વડીલ, આપ્‍તજન અને માર્ગદર્શક પૂ. કિરીટભાઇ ગણાત્રા તથા મને હંમેશા પ્રોત્‍સાહિત કરતા ‘અકિલા'ના તંત્રી પૂ. અજીતભાઇ ગણાત્રાને પણ હું વંદન કરૂ છું.

      સૌને જય જલારામ બાપા.

       જયશ્રી કૃષ્‍ણ.

      ન્‍યુઝીલેન્‍ડની સરકાર ભવિષ્‍યમાં ‘પી.આર. શીપ'નાં નિયમો કદાચ હળવા કરી શકે !

      હાલમાં ન્‍યુઝીલેન્‍ડની ઓછી વસ્‍તી જોતા તથા ત્‍યાં વિવિધ જગ્‍યાઓએ કામ કરતા લોકોની પ્રમાણમાં મોટી ઉંમર જોતા એવું લાગે છે કે ભવિષ્‍યમાં અુમક વર્ષો પછી ન્‍યુઝીલેન્‍ડની સરકાર પરમેનન્‍ટ રેસીડેન્‍સીયલ શીપના નિયમો અન્‍ય દેશોના લાયકાત ધરાવતા યંગસ્‍ટર્સ માટે હળવા બનાવી શકે.

      કારણ કે હાલમાં ત્‍યાં એરપોર્ટ સહિત વિવિધ જાહેર સ્‍થળોએ કામ કરતા લોકો બસ ડ્રાઇવર કે પછી અન્‍ય મહેનતવાળા કામ કરનારા લોકો પ્રમાણમાં મોટી ઉમરના લાગી રહ્યા છે.

      આવા બધાં ક્ષેત્રોમાં યંગસ્‍ટર્સની સંખ્‍યા પ્રમાણમાં ઓછી જોવા મળતી હોય છે. જેથી ભવિષ્‍યમાં ન્‍યુઝીલેન્‍ડને વિશ્વના અન્‍ય દેશોમાંથી વેલટ્રેઇન્‍ડ, વેલ એજ્‍યુકેટેડ અને જુદા-જુદા ક્ષેત્રોના નિષ્‍ણાંતોની જરૂર પડશે તેવી શકયતા નકારી શકાતી નથી. ભારતના તથા ગુજરાતના યંગસ્‍ટર્સ માટે પણ ઘણી ઉજળી શકયતાઓ દેખાઇ રહી છે.

      ન્‍યુઝીલેન્‍ડ જતા પહેલા થોડી તકેદારી : પ્રવાસને ઘણો સરળ અને આનંદિત બનાવી શકે છે- રૂપિયા પણ બચી શકે છે

      * ન્‍યુઝીલેન્‍ડથી આપણે ઇન્‍ડિયા ફોન કરવાના જ હોય છે.ઇન્‍ડિયાથી ઇન્‍ટરનેશનલ રોમીંગ કરાવાથી ન્‍યુઝીલેન્‍ડથી ફોન કરવાનું કે પછી ઇન્‍ડિયાથી આવતા ફોન રીસીવ કરવાનું પ્રમાણમાં મોંઘુ પડી શકે છે. તેના કરતાં ન્‍યુઝીલેન્‍ડ પહોંચીને આપણો પાસપોર્ટ બતાવીને ત્‍યાનું કાર્ડ લઇને ઇન્‍ડિયા વાત કરવી હિતાવહ સાબિત થઇ શકેછે.

      આ ઉપરાંત મોબાઇલમાં ‘વાઇબર' એપ ડાઉનલોડ કરીને લઇ જવાથી ન્‍યુઝીલેન્‍ડથી હોટલમાં ફ્રી વાઇ-ફાઇ હોવાથી વિનામુલ્‍યે કે પછી સાવ નહિવત જેવા ચાર્જથી સરળતાથી ઇન્‍ડિયા વાત થઇ શકે છે. બંને ઇન્‍સ્‍ટ્રુ્રુમેન્‍ટમાં ‘વાઇબર' એપ હોવું  જરૂરી છે. સાથે-સાથે અમુક સમય માટે ફ્રી વાઇ-ફાઇ હોવાને કારણે વોટસએપ દ્વારા મેસેજીસ કે વોઇસ મેસેજીસ આસાનીથી વિનામૂલ્‍યે અરસપરસ થઇ શકે છે.સ્‍કાયપી થી પણ સરળતાથી વાતચીત કરી શકાય છે.

      * ન્‍યુઝીલેન્‍ડમાં ઇલેકટ્રીક પ્‍લગ સંદર્ભે ર૩૦ થી ર૪૦ વોલ્‍ટસનો પાવર છે તથા ફલેટ પીન વાળો પ્‍લગ હોય છે. જેથી મોબાઇલ, કેમેરા વિગેરે ચાર્જ કરવા માટે ત્‍યાંની હોટલમાંથી એડેપ્‍ટર લેવું પડે છે. (જો હોય તો). અથવા તો અહીં ઇન્‍ડિયામાં મળતું ઇન્‍ટરનેશનલ ચાર્જર (મલ્‍ટી પીન એડેપ્‍ટર) લઇ જવું ખાસ જરૂરી છે. જેથી ચાર્જીંગ ડીવાઇસીસમાં વાંધો ન આવે. મુસાફરી દરમ્‍યાન ફલાઇટમાં તો મોટાભાગેશ્‍લ્‍ગ્‍ ચાર્જર આપેલું હોય જ છે.

      * ન્‍યુઝીલેન્‍ડમાં હોટલ કે એપાર્ટમેન્‍ટની બહાર નીકળતા પાણીની બોટલ વેચાતી લેવી પડે છે. ત્‍યાં પાણીની બોટલ ૪ થી પ ડોલરની આવે છે. એટલે આપણાં એક લિટરના ર૦૦ થી રપ૦ રૂ. થાય. પ્રવાસ દરમ્‍યાન આવી ઘણી બધી બોટલોની જરૂર પડતી હોય છે. તો હિતાવહ એ છે કે અહીંથી સાથે એકથી બે પાણીની ખાલી બોટલ લઇ જવી જોઇએ. જેથી સવારે હોટલની બહાર નિકળીએ ત્‍યારે ભરીને લઇ જઇ શકાય. આમ ઘણા બધાં રૂપિયા બચાવી શકાય છે.

      * આ ઉપરાંત સેફટીપીન (થેલા-થેલીનો ચેન તુટી જાય તો), એક લાંબી પાતળી અને મજબુત દોરી (સામાન-સૂટકેશ અધવચ્‍ચે તૂટી જાય તો), સોઇદોરો, ફેવીકિવક (ચપ્‍પલ-સ્‍લીપર-ફલોટર્સ-શૂઝ-ચશ્‍મા વિગેરે તૂટે તો) વિગેરે લઇ જવું હિતાવહ છે.

      * ન્‍યુઝીલેન્‍ડમાં જુનથી ડીસેમ્‍બર મહિના સુધી મહત્તમ તાપમાન ૧૯ ડીગ્રી અને લઘુતમ તાપમાન ૧ર ડીગ્રી જેટલું હોય છે. કયારેક વધુ ઠંડી પણ પડે છે. જેથી ગરમ કપડાં પૂરતા પ્રમાણમાં લઇ જવા હિતાવહ છે. ઘણીવાર ભારે વરસાદ પણ જોવા મળે છે. નાની છત્રી પણ આશીર્વાદરૂપ બને છે.

      * સામાન્‍ય બિમારીને લગતી રૂટીન દવાઓ તથા નિયમિત રીતે લેવાતી દવાઓ માટે ડોકટરનું પ્રિસ્‍ક્રીપ્‍શન અચૂક સાથે રાખવું.

      * પાસપોર્ટ સહિતના અગત્‍યના ડોકયુમેન્‍ટસની ફોટકોપી અન્‍ય સામાનમાં રાખવી હિતાવહ છે.એક કોપી ઇન્‍ડિયામાં પણ રાખી શકાય છે.

      * ન્‍યુઝીલેન્‍ડમાં કોઇપણ જાતની તકલીફ પડે કે અસલામતી લાગે તો તુરત જ ઇમરજન્‍સી નંબર ૧૧૧ ઉપર કોલ કરી શકાય છે.

      * દરેક જગ્‍યાએ સમયનું ચુસ્‍ત પાલન કરવું જરૂરી છે.

      * આપણા સામાનની ઓળખ માટે કંઇક નિશાની રાખવી જરૂરી છે. (ટેગ, દોરી, કપડું, કાર્ડ વિગેરે)

      * ત્‍યાં પબ્‍લિક પ્‍લેસ ઉપર આલ્‍કોહોલ પીવાની સ્‍મોકીંગ કરવાની અને ચ્‍યુંગમ ખાવાની મનાઇ છે. હોટલ કે પબમાં બેસીને થઇ શકે છે.

      * પ્રવાસમાં જતા પહેલા મેડીકલ ઇન્‍સ્‍યોરન્‍સ વિશે જાણી લેવું હિતાવહ છે.

      * આપણી પાસે કોઇપણ જાતની ફુડ આઇટમ હોય તો તે કસ્‍ટમમાં ડીકલેર કરવી જરૂરી છે.

      * હાઇકીંગ શુઝ, સ્‍પોર્ટીંગ અથવા કેમ્‍પીંગ ઇકવપમેન્‍ટસ આપણી પાસે હોય તો તે પણ કસ્‍ટમમાં ડીકલેર કરવા જરૂરી છે ઉપરાંત તે એકદમ સ્‍વચ્‍છ હોવા જોઇએ.

      * કોઇપણ જાતના નટસ, ડ્રાયફુટ, સીડઝ, શીંગ, ઘી, આયુર્વેદિક દવાઓ વિગેરે કદી ન જ લઇ જવા. આને કારણે ભારે દંડ થઇ શકે છે.

      * ગ્રુપમાં ગયા હોઇએ તો બધાંએ સાથે રહેવું હિતાવહ છે.

      ન્‍યુઝીલેન્‍ડ પ્રવાસના સ્‍વઅનુભવોનું રસપ્રદ

      * આલેખન*

      ડો. પરાગ દેવાણી

      રાજકોટ મો. ૯૮ર૪૪ પ૧પ૪૧

 (04:16 pm IST)
 

Share This News

Facebook
Twitter
Blogger
 

Follow Akilanews.com

Facebook
Twitter
YouTube
RSS