vividh-vibhag

News of Wednesday, 8th October, 2014

દિવાળી ઉપર ફરવા જવા માટે લોકો તલપાપડ

ગોવા-કેરાલા-મનાલી-મથુરા-હરીદ્વાર-દાર્જીલિંગ-ઉંટી-ખંડાલા-જેસલમેર-સાસણગીર-સોમનાથની સહેલગાહે નિકળવા લોકોમાં જબરૂ આકર્ષણ.- ફોરેન ટુરમાં દુબઇ ડ્રીમ ડેસ્‍ટીનેશન બન્‍યું.- સિંગાપુર-મલેશીયા-થાઇલેન્‍ડ-હોંગકોંગ-મકાઉ માટે પણ લોકોમાં ક્રેઝ.- સ્‍ટાર ક્રુઝ સંદર્ભે લોકોમાં થોડી અસમંજસ. - પૂર-તબાહીને કારણે કાશ્‍મીર બંધ રહેતા ત્‍યાંનો ટ્રાફીક હિમાચલ, ઉતરાંચલ, નોર્થઇસ્‍ટ તથા રાજસ્‍થાન

દિવાળી ઉપર ફરવા જવા માટે લોકો તલપાપડ

           માહિતી અને ટેકનોલોજી સાથેની ર૧મી સદી જેમ-જેમ આગળ વધતી જાય છે તેમ તેમ દિનપ્રતિદિન માણસોની વિચારસરણીમાં પણ સતત પરિવર્તન આવતું દેખાય રહ્યું છે. આ પરિવર્તનના ભાગરૂપે તહેવારોમાં મળતી રજાઓનો ઉપયોગ પણ લોકો પોતપોતાના પરિવાર અને ગ્રુપ સર્કલ સાથે સરસ મજાની જગ્‍યાએ સહેલગાહે નિકળીને કરવા માંડયા છે.

         સોળ દિવસ પછી આવતી દિવાળી ઉપર પણ ભારત અને વિદેશોમાં સહેલાણીઓના ફેવરીટ ડેસ્‍ટીનેશન્‍સે લોકોમાં જબરૂ આકર્ષણ જગાવ્‍યું છે. ફરવા જવા માટે ક્રેઝી લોકો અત્‍યારે તો જોરદાર તૈયારીમાં લાગી ગયા છે. ઘણા લોકો પોતાના મનગમતા સ્‍થળે જવા માટે છેલ્લી ઘડીએ ટીકીટો તથા હોટલ બુકીંગ માટે દોડા-દોડી કરી રહ્યા છ.ે પસંદગીના સ્‍થળોએ જવા માટે ટ્રેઇનોમાં લાંબુ વેઇટીંગ લિસ્‍ટ બની ગયાનું જાણવા મળે છે. ટ્રેન-પ્‍લેન ઉપરાંત પસંદગીની બસોમાં પણ લાંબા વેઇટીંગ લીસ્‍ટસ ઓપરેટ થઇ રહ્યા છે.

         તંત્ર દ્વારા અમદાવાદ સહિત અમૂક જગ્‍યાએથી હોલી-ડે સ્‍પેશ્‍યલ ટ્રેનો દોડાવવા છતાં પણ દિવાળી તથા વેકેશન દરમ્‍યાન પસંદગીની તમામ ટ્રેનો હાલમાં હાઉસકુલ હોવાનું જાણવા મળે છે.

         ભાઇબીજ નિમિતે મથુરાનું અસામાન્‍ય મહત્‍વ હોવાથી તથા ગંગાસ્‍નાન માટે પણ ભાવિકોનો અવિરત પ્રવાહ રહેતો હોવાથી દિલ્‍હી, હરીદ્વાર, મથુરા, બનારસ તરફની ટ્રેઇનોમાં આવવા-જવામાં રાજકોટ અને અમદાવાદથી ટીકીટ માટે ભારે ઘસારો રહ્યો છે.

         આ વર્ષે લોકો એવરગ્રીન એવું ગોવા, મહાબળેશ્વર, લોનાવાલા, ખંડાલા, પંચગીની, એસેલવર્લ્‍ડ, કેરાલા, બેંગ્‍લોર, દિવ, આબુ, ઉદયપુર, સાસણગીર, હોલીડે કેમ્‍પ સહિતના સ્‍થળોએ હોંશે હોંશે દિવાળીની રજાની મોજ માણવા તલપાપડ હોવાનું જાણવા મળે છે.

         શ્રીનાથદ્વારા, ગોકુળ, મથુરા, હરીદ્વાર, તિરૂપતી બાલાજી, રામેશ્વર, સોમનાથ, ગીરનાર, દ્વારકા જેવા ધાર્મિક સ્‍થળોએ જવા માટે પણ લોકોનો ધસારો ઘણો જ છે. ભયંકર ટ્રાફીકને કારણે ઘણા લોકો તો હરીદ્વાર જવા માટે અમદાવાદથી દિલ્‍હી ફલાઇટ લઇને અને ત્‍યારબાદ દિલ્‍હીથી હરીદ્વાર મેલમાં હરીદ્વાર પહોંચવાના પ્‍લાનમાં છે.

         લોકો ધર્મેજ, નિલકંઠ મહાદેવ, સાપુતારા, નાસિક, ત્રંબકેશ્વર, શનિદેવ, દેવગઢ, શિરડી અને સપ્તસુંગીના રૂટ ઉપર પણ ઉમળકાભેર જઇ રહ્યા છે.

         તાજેતરમાં આવેલા ભયંકર પૂરને કારણે કાશ્‍મીર આ વખતે સદંતર બંધ છે. જેના કારણે ત્‍યાંનો ટ્રાફીક હિમાચલ, ઉતરાંચલ તથા નોર્થ ઇસ્‍ટ બાજુ ડાયવર્ટ થયો હોવાનું રાજકોટના ફેવરીટ ટુર્સ એન્‍ડ ફોરેક્ષ પ્રા.લી.ના દિલીપભાઇ મસરાણી(મો.૯૮૭૯પ ૪૦૬૩૩) તથા દર્શીતભાઇ ડી.મસરાણી જણાવી રહ્યા છે. કાશ્‍મીર પેકેજ કેન્‍સલ કરાવનાર પાસેથી જે-તે એરલાઇન્‍સે પણ કેન્‍સેલેશન ચાર્જ ન લીધો હોવાનું જાણવા મળે છે.

         ઉતરાંચલના નૈનિતાલ, રાનીખેત, કોર્બેટ, મસૂરી અને હરીદ્વારના એકસ દિલ્‍હી ૬ રાત્રી ૭ દિવસના પેકેજ વ્‍યકિત દીઠ ૧૮૦૦૦ રૂા.માં વેચાયા હોવાનું જાણવા મળે છે. જો કે ત્‍યાં હોટલ અને ટ્રાન્‍સપોર્ટેશન પેક હોવાથી હવે ઊંચી કિંમતે પણ ગમતા પેકેજ ન મળતા  હોવાનું જાણવા મળે છે.

         નોર્થ ઇસ્‍ટના દાર્જીલીંગ, ગંગટોક, લાચુંગ, પેલીંગ, યુમથાંગનાં પેકેજ એકસ બાગડોગરા (બાય એર) તથા એકસ જલપાઇગુડી (બાય ટ્રેઇન) વ્‍યકિત દીઠ  ર૧૦૦૦ રૂા.માં  વેચાયા છે. જેમાં ૭ રાત્રી ૮ દિવસ સામેલ છે. હિમાચલનાં એકસ દિલ્‍હી ૬ રાત્રી ૭ દિવસનાં પેકેજ (બાય એર) વ્‍યકિત દીઠ ૧૯ થી ર૦ હજારમાં ખપી રહ્યાનું જાણવા મળે છે. ૯ રાત્રી ૧૦ દિવસનાં પેકેજ ર૩પ૦૦ રૂા. આસપાસ વેચાયા છે.

         ઘણાં નવા નવા ડેસ્‍ટીનેશન્‍સ ખૂલવા માંડતા લોકોને પણ પોતાના બજેટમાં અને પોતાને જોઇતી ફેસેલીટી પ્રમાણે જુદા-જુદા સ્‍થળે ફરવાનો અમૂલ્‍ય મોકો હવે મળી રહ્યાનું સનરાઇઝ ટુર્સ એન્‍ડ ટ્રાવેલ્‍સ રાજકોટનાં છબીલભાઇ કારીયા તથા સમીરભાઇ કારીયા (મો. ૯૮રપ૩ ૭૭૭૦૪) જણાવી રહ્યા છે.

         આ વખતે કેરાલા, સાઉથ કેરાલા તથા નોર્થ કેરાલા પણ ખૂબ જ ચાલ્‍યા છે. કેરાલાનો એકસ અમદાવાદ (બાય એર) ૭ રાત્રી ૮ દિવસનો પેકેજ વ્‍યકિત દીઠ ૩પ થી ૪૦ હજાર આસપાસ ફટાફટ વેચાયો હોવાનું સુત્રોનું કહેવું છે. સાઉથ કેરાલા (કોચીનથી કોચીન) ના ૬ રાત્રી ૭ દિવસનો પેકેજ વ્‍યકિત દીઠ ૧૯પ૦૦ રૂા. આસપાસ વેચાયા છે. જયારે નોર્થ કેરાલાના વૈથ્રી, વૈનાડ, કડાઉ વિગેરેનાં પેકેજ વ્‍યકિત દીઠ રૂા. ર૮પ૦૦ માં હોટકેકની જેમ સેલ થયા છે.

         કુર્ગ અને કબીનીમાં પણ જબ્‍બર ટ્રાફીક જોવા મળે છે. પરંતુ ત્‍યાંના પેકેજ થોડા કોસ્‍ટલી ગણાય છે. સાઉથ ઇન્‍ડિયામાં ટ્રેડીશ્‍નલ સાઉથ-બેંગ્‍લોર, મૈસૂર, ઊંટી, કોડાઇ કેનાલનાં એકસ બેંગ્‍લોર ૭ રાત્રી ૮ દિવસનાં પેકજ વ્‍યકિત દીઠ રર૦૦૦ રૂા. આસપાસ વેચાયા છે.

         મુંબઇની આજુ બાજુની જગ્‍યાઓ પણ ખૂબ જ ચાલી છે. જેમાં રીસોર્ટસનાં ર રાત્રી ૩ દિવસના પેકેજીસ કપલ દીઠ ૧૦ થી ૧પ હજારમાં મોટા પ્રમાણમાં વેચાયા છે. આવા  સ્‍થળોમાં ચીપ્‍લુન, ગણપતી પુલે, માલવણ, અલીબાગ, રાયગઢ વિગેરેનો સમાવેશ થાય છે.

         ફરવામાં એવરગ્રીન એવું ગોવાના ત્રણ રાત્રી ચાર દિવસના ફોરસ્‍ટાર હોટલનાં એકસ અમદાવાદ પેકેજ કપલદીઠ ૩૦ થી ૪૦ હજાર રૂપિયામાં બુક થયા છે.

         ગુજરાતથી નજીક હોવાના લીધે તથા કાશ્‍મીર આ વખતે બંધ હોવાથી રાજસ્‍થાનનાં ૭ રાત્રી ૮ દિવસનાં કપલ પેકેજ ૪૦૦૦૦ રૂા. આસપાસ ઘણાં જ વેચાયા છે. જેમાં માત્ર હોટલનું ભાડું જ સામેલ હોવાનું સંભળાય છે. કુલુ મનાલીનાં એકસ અમદાવાદ ૭ રાત્રી ૮ દિવસનાં પેકેજ ૨પ હજારથી શરૂ થતાં હોવાનું અગ્રણી ટ્રાવેલ એજન્‍ટસનું કહેવું છે.

         ગુજરાતમાં નડીયાદ ખાતે આવેલ બુલવર્ડ-૯ રીસોર્ટમાં પણ એક રાત્રી બે દિવસનાં કપલદીઠ ૧૧૦૦૦ રૂા.માં લોકો બુકીંગ કરાવી રહયાનું જાણવા મળે છે.

         જો કે આ વર્ષે બજારમાં મંદીની તથા મોંઘવારીની અસર ઘણી બધી જોવા મળે છે. પરિણામે ગઇ દિવાળી કરતાં ૩૦ થી ૪૦ ટકા જેટલો ટ્રાફીક ઓછો હોવાનું અગ્રણી ટ્રાવેલ એજન્‍ટસનું કહેવું છે. દિવસે દિવસે ઓનલાઇન બુકીંગનો ક્રેઝ પણ વધતો જાય છે. જેનો લાભ પણ લોકો હોંશે હોંશે લઇ રહયા છે. દા.ત. મેક માયટ્રીપ, યાત્રા ડોટ કોમ વિગેરે.

         ટ્રેન, પ્‍લેન ઉપરાંત એ.સી-નોન એ.સી બસ દ્વારા પણ રાજકોટ થી દિવાળી વેકેશન સ્‍પેશ્‍યલ પેકેજ ઉપડી રહયા છે. રાજકોટથી જીરાવાલા ટુરીઝમ-બિરેનભાઇ ધ્રુવ (મો-૯૩૭૫૬ ૪૮૫૦૦) દ્વારા (એકસ અમદાવાદ) લકઝરી બસ દ્વારા પણ હરીદ્વાર-મથુરા (૧૦ દિવસ-કપલ દીઠ ૨૯૭૫૦ રૂા.) , કુલુ-મનાલી-સિમલા-ડેલહાઉઝી (૧૨ દિવસ-કપલદીઠ ૩૮૨૫૦ રૂા.), ગોવા-મહાબળેશ્વર-લોનાવાલા (૮ દિવસ-કપલદીઠ ૨૩૭૫૦), સપ્ત : જયોર્તિલીંગ-દ. ભારત-રામેશ્વર-તિરૂપતી (૨૨ દિવસ-કપલદીઠ ૬પ૦૦૦ રૂા.)નાં  તથા અન્‍ય જગ્‍યાઓના  પેકેજીસ ઉપડી રહયા છે.

         ઉપરાંત રાજકોટનાં કેશવી ટુર્સ એન્‍ડ ટ્રાવેલ્‍સ (ફોન-૦૨૮૧-૨૩૮૬૬૬૬) દ્વારા પણ દિવાળી દરમ્‍યાન બસ દ્વારા વિવિધ પેકેજીસ ઉપડી રહયા છે. જેમાં ગોવા, કેરાલા, રાજસ્‍થાન, કુલુ-મનાલી-સીમલા, પંચમઢી, નેપાળ, દાર્જીલિંગ, હરીદ્વાર, સપ્ત જયોર્તિલીંગ વિગેરેનો સમાવેશ થાય છે. આ પેકેજીસ નો લાભ લેનારને લકકી ડ્રો દ્વારા મારૂતી સ્‍વિફટ કાર જીતવાનો મોકો મળતો હોવાનું પણ જાણવા મળે છે.

         દિવ અને માઉન્‍ટઆબુ હંમેશની માફક હાઉસફુલ જોવા મળે છે. સસ્‍તી મુસાફરી અને વાહન વ્‍યવહારની સુવિધાને કારણે લોકો આ બંને ડેસ્‍ટીનેશન્‍સ પર પોતાની પસંદગી ઉતારે છે. સાસણગીર પણ આવું જ આકર્ષણ ધરાવે છે. સાપુતારા પણ લોકો જઇ રહયા છે.

         ફોરેન ટુરના વિવિધ પેકેજીસ

         ફોરેન જવાવાળા સહેલાણીઓની વાત કરીએ તો આ વર્ષે દુબઇ લોકોની ટોપ પ્રાયોરીટી છે. જેનાં પાંચ રાત્રી છ દિવસના એકસ અમદાવાદનાં બેસ્‍ટ પેકેજીસ વ્‍યકિતદીઠ ૬૦૦૦૦ રૂા. આસપાસ હોટકેકની જેમ ખપી રહ્યા છે. સામાન્‍ય રીતે પણ દુબઇ લોકોનું ડ્રીમ ડેસ્‍ટીનેશન રહેતું હોવાનું દિલીપભાઇ મસરાણી, સમીરભાઇ કારીયા સહિતના અગ્રણી ટ્રાવેલ એજન્‍ટ્‍સનું કહેવું છે. રાજકોટથી બેસ્‍ટ ટુર્સ એન્‍ડ ટ્રાવેલ્‍સનાં ઇન્‍ટરનેશનલ પેકેજીસ પણ ઉપડતા જ હોય છે.

         ઘણાં બધાં પસંદગીના ડેસ્‍ટીનેશન્‍સની ડોમેસ્‍ટીક ટીકીટ કરતા ઇન્‍ટરનેશનલ એર ટીકીટ સસ્‍તી મળતી હોવાથી ફોરેન ટૂરનાં પેકેજીસ વધુ ચાલતા હોવાનું સંભળાય છે. વળી, ડોમેસ્‍ટીકમાં તો ભારતની અંદર ફરવાનું. આ તો ફોરેન ટુર ગણાય તે નફામાં !

         જો કે આ વખતે ઘણાં ઇન્‍ટરનેશનલ રૂટમાં એરટીકીટ જ અવેલેબલ નથી. તો તેની સામે મંદીનો સામનો કરવા વિવિધ એરલાઇન્‍સો દ્વારા વિવિધ સ્‍કિમ્‍સ પણ ઓફર કરાતી હોવાનું જોવા મળે છે ! માત્ર થાઇલેન્‍ડ પણ લોકો જઇ રહ્યા છે.

         આ ઉપરાંત દિવાળી સ્‍પેશ્‍યલ સિંગાપુર, મલેશીયા, થાઇલેન્‍ડ વીથ ક્રુઝના ૧૧ રાત્રી ૧૨ દિવસનાં સુપર્બ પેકેજ (રાજકોટથી રાજકોટ) પ્રતિ વ્‍યકિત ૧,૨૧,૦૦૦ રૂા.માં ધડાધડ વેચાયા હોવાનું જાણવા મળે છે. જેમાં ગુજરાતી ટુર લીડર સાથે હોવાનો લાભ પણ મળી શકે છે.

         હોંગકોંગ, મકાઉ, સેન્‍ઝેન વીથ ક્રુઝના ૭ રાત્રી ૮ દિવસના એકસ રાજકોટ પેકેજ વ્‍યકિતદીઠ ૮૯૦૦૦ રૂા. આસપાસ વેચાયા હોવાનું સંભળાય છે.

         સ્‍ટાર ક્રુઝ વિશે આ વખતે મહત્‍વની વાત એ જાણવા મળે છે કે સિંગાપુર - મલેશીયા વચ્‍ચે ખૂબ જ સરસ રીતે ચાલતી આકર્ષણરૂપ સ્‍ટાર વર્ગો ક્રુઝ હવે હોંગકોંગમાં મૂકી છે, અને તેની જગ્‍યાએ સ્‍ટાર જેમીની ક્રુઝ મુકી છે. જેને કારણે બુકીંગ મેળવવામાં થોડી અગવડ પડતી હોવાનું સાંભળવા મળે છે. ઘણાં લોકોને નિરાશ પણ થવું પડયું છે.

         આ સાલ મંદી અને મોંઘવારીને કારણે પસંદગીના સ્‍થળોએ જવા મુસાફરીના હવાઇભાડા તેમજ હોટલભાડા સહિતના ખર્ચમાં વધારો થવાને કારણે વિવિધ પેકેજીસના રેઇટ્‍સમાં પણ ઘણો ખરો ફેરફાર થયો હોવાનું જાણવા મળી રહ્યું છે.

         છતાં પણ આજની આ ૨૧મી સદીમાં આમૂલ પરિવર્તનના ભાગરૂપે લોકો તમામ તહેવારોને વિવિધ રીતે યાદગાર બનાવતા હોવાનું જોવા મળે છે.

         ટુંકમાં વિશ્વમાં કોઇપણ જગ્‍યાએ જઇએ ત્‍યાં ગુજરાતીઓ - સૌરાષ્‍ટ્રવાસીઓ ન હોય તો જ નવાઇ ! પછી તે વેપાર અર્થે હોય કે પછી ફરવા અર્થે. અને એ જ ગુજરાત - સૌરાષ્‍ટ્રની ખમીરવંતી પ્રજાની સાચી ઓળખ છે.

         જય જય ગરવી ગુજરાત સાથે સર્વેને હેપી જર્ની તથા દિવાળી અને નવા વર્ષની હૃદયપૂર્વકની શુભ કામનાઓ.

         જયશ્રી કૃષ્‍ણ...

         -: આલેખન :-

         ડૉ. પરાગ દેવાણી

         મો. ૯૮૨૪૪ ૫૧૫૪૧

          

 (05:17 pm IST)
 

Share This News

Facebook
Twitter
Blogger
 

Follow Akilanews.com

Facebook
Twitter
YouTube
RSS